Grabiten mbi 200 mld dollarë fonde të pandemisë – Fondet federale ishin destinuar për të ndihmuar bizneset e vogla në SHBA
200 miliardë dollarë të destinuara si mbështetje për bizneset e vogla gjatë pandemisë së Covid, janë vjedhur nga mashtruesit. Nga kjo shumë vetëm 30 miliardë dollarë janë mundur të rekuperohen nga agjencitë federale të zbatimit të ligjit
Mbi 200 miliardë dollarë fonde federale të destinuara për të ndihmuar bizneset e vogla që përballeshin me pasojat e pandemisë së Covid-19 në Shtetet e Bashkuara të Amerikës, janë grabitur.
Zyra e Inspektorit të Përgjithshëm vlerësoi në një raport të ri se të paktën 17% e 1.2 trilion dollarëve të disbursuara nga Administrata e Biznesit të Vogël mund të jenë grabitur nga persona mashtrues.
Më shumë se 136 miliardë dollarë nga programi i huasë për katastrofa për dëme ekonomike dhe 64 miliardë dollarë nga kreditë e Programit për Mbrojtjen e Pagave janë vjedhur, sipas të dhënave të isnpektoriatit të përgjithshëm. Në total, u shpërndanë 400 miliardë dollarë në grante dhe 800 miliardë dollarë në hua të Programit të Mbrojtjes së Pagave gjatë kohëzgjatjes së programeve.
Inspektoriati i përgjithshëm tha se një numër dërrmues mashtruesish të tërhequr nga paratë e lehta mundën të përfitonin nga programet për shkak se u lehtësuan kontrollet e brendshme në nxitimin për të shpërndarë ndihmë për bizneset e vogla që po luftonin për mbijetesë gjatë mbylljes së pandemisë.
Shifrat e publikuara tregojnë se 12% e kredive shkuan për huamarrësit të cilët janë në vonesë, shumica e të cilëve janë biznese reale që janë mbyllur ose thjesht nuk patën mundësi të shlyenin detyrimet e tyre financiare. Rreth 74% e bizneseve ose i kanë shlyer plotësisht ose kanë filluar të shlyejnë kreditë e tyre ndërsa 14% janë ende në periudhën e shtyrjes së afateve .
Sipas raportit, hetimet e zyrës së inspektoriatit të përgjithshëm kanë çuar në më shumë se 1 mijë aktakuza, 803 arrestime dhe 529 dënime në lidhje me mashtrime në programet e kredisë. Këto hetime kanë çuar në sekuestrimin ose kthimin e kredive të vjedhura prej afro 30 miliardë dollarësh nga agjencitë federale të zbatimit të ligjit.
Sipas raportit, zyra e inspektoriatit të përgjithshëm po punon ende për dhjetëra mijëra pista hetimore për shpërdorime, mashtrime dhe abuzime në programet e kredisë. Mijëra nga këto hetime pritet të vazhdojnë për vite me rradhë.
Programi për Mbrojtjen e Pagave ofroi kredi të garantuara për bizneset e vogla, individët dhe organizatat jofitimprurëse që mund të faleshin nëse huamarrësi plotësonte disa kushte. Programi i huasë për dëmtime ekonomike nga katastrofat siguroi kredi me interes të ulët dhe me normë fikse për të ndihmuar bizneset e vogla dhe organizatat e tjera për të ndihmuar në mbulimin e shpenzimeve të tyre operative.
Dorina Kurtaj / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.