Spanja stimulon automjetet elektrike – Qeveria ul taksat për ata që zgjedhin këtë alternativë
Spanja do të rimbursojë deri në 15% të tatimit mbi të ardhurat për njerëzit që blejnë një automjet elektrik përpara fundit të vitit për të inkurajuar një ambjent më të pastër. Lajmi u konfirmua nga ministrja spanjolle e Ekonomisë Nadia Calvino.
Nisma është pjesë e një pakete kundër inflacionit me vlerë 8.9 miliardë euro në të cilën masa të tjera tashmë të vendosura – si subvencionet e transportit publik dhe reduktimet e taksave të vlerës së shtuar për ushqimet bazë – do të zgjaten deri më 31 dhjetor, ndërsa masat ishin caktuar të përfundonin më 30 qershor.
Sipas ministres Calvino, qëllimi është konsolidimi i investimeve që po kryhen në vend për modernizimin e industrisë së automjeteve dhe vendosja e Spanjës në krye të listës së shteteve që shpërndajnë automjete elektrike në Europë. Ajo shtoi se zbritja maksimale e tatimit mbi të ardhurat do të ishte 20 mijë.
Calvino tha se mbështetja totale e shtetit – duke përfshirë reduktimet e taksave, subvencionet dhe grantet – që nga pushtimi rus i Ukrainës në shkurt 2022 – arriti në 47 miliardë euro.
Sipas saj situata makroekonomike është e favorshme dhe Spanja po përballet shumë më mirë se pjesa tjetër e Europës me skenarin e ndërlikuar ndërkombëtar, por lufta dhe rritja e normave të interesit vazhdon të ketë efektet e saj prandaj paketa do të lejojë që vendi të ecë me qetësi dhe besim në gjysmën e dytë të vitit, me shpresën që kjo luftë të përfundojë sa më shpejt të jetë e mundur.
Kryeministri spanjoll Pedro Sanchez kishte lënë të kuptohet për masën e re në një intervistë dhe tha se projekti ishte përfshirë tashmë në një shtojcë të dorëzuar në Komisionin Europian.
Sanchez ka thirrur zgjedhje të përgjithshme të parakohshme më 23 korrik. Është e paqartë nëse një qeveri e re e mundshme e udhëhequr nga Partia Popullore konservatore do të mbante ose shfuqizonte shumë nga politikat ekonomike të zbatuara nga koalicioni i udhëhequr nga socialistët e Sanchez.
Dorina Kurtaj / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.