Grekët shpenzojnë 40 miliardë euro më shumë se sa deklarojnë – Guvernatori i Bankës Qendrore: “Ekonomia gri” përbën 20.9% të PBB

Guvernatori i Bankës së Greqisë, Yannis Stournaras, deklaroi se grekët shpenzojnë 40 miliardë euro më shumë sesa deklarojnë si të ardhura. Ky ndryshim pasqyron madhësinë e “ekonomisë gri”, tha Stournaras, duke shtuar se të dhënat e fundit, nga të ardhurat dhe shpenzimet e vitit 2021 e vendosin atë në 20.9% të PBB-së. Ai theksoi se është gjithashtu një matës i besueshëm i evazionit fiskal, megjithëse evazioni dhe “ekonomia gri” nuk janë e njëjta gjë.

Në periudhën 2015-2021, këto shpenzime të tepërta varionin nga 36 miliardë, në 49 miliardë euro.

Të ardhurat totale të deklaruara për vitin 2021 ishin rreth 84 miliardë euro, nga të cilat 79% vinin nga punëtorët me pagë, përfshirë punonjësit e marinës tregtare. Këto kategori, që nuk mund të fshehin të ardhurat e tyre, të cilat tatohen në burimin e tyre, paguajnë taksa të larta në mënyrë disproporcionale.

Rreth 70% e tatimpaguesve të angazhuar në një formë të aktivitetit tregtar, apo të vetëpunësuar deklarojnë të ardhura vjetore më pak se 10 mijë euro dhe 37% e tatimpaguesve individualë deklarojnë të ardhura deri në 5 mijë euro.

Që të vetëpunësuarit dhe ndërmarrjet shumë të vogla fshehin në mënyrë disproporcionale të ardhurat e tyre nuk është unike për Greqinë, pasi kjo ndodh pothuajse në çdo vend, tha Stournaras.

Sigurisht, shumë të pasurit kanë mënyrat e tyre për të shmangur pagimin e taksave, nëpërmjet kompanive offshore dhe përdorimit të faturave të rreme.

Shmangia e taksave shtrihet në taksat indirekte: në vitin 2020, Greqia ishte e 4-ta ndër anëtarët e BE-së në mospagesat e Tatimit mbi Vlerën e Shtuar; vonesa midis arkëtimeve të TVSH-së së pritshme dhe atyre aktuale vlerësohet në 19.7% ose rreth 3 miliardë euro. Megjithatë, sipas Stournaras, ka pasur përparim në këtë front si rezultat i presionit për të miratuar metodat e pagesave elektronike.

Stournaras dha gjashtë propozime për atë që mund të bëhet për të luftuar evazionin fiskal. Së pari bëhet fjalë për zgjerimin e transaksioneve elektronike për të mbuluar më shumë aktivitete ekonomike; ofrimi i stimujve për pagesat me karta krediti ose debiti dhe nëpërmjet sistemit bankar; lehtësime tatimore për ata që zbulojnë transaksione të padeklaruara, veçanërisht në sektorë me nivele të larta të evazionit fiskal të provuar; përmirësimi i vazhdueshëm i sistemeve të monitorimit elektronik të transaksioneve të Autoritetit të të Ardhurave Publike; sigurimi i një regjimi tatimor të qëndrueshëm dhe të thjeshtuar; si dhe intensifikimi i përpjekjeve për të krijuar një kulturë të llogaridhënies së të ardhurave.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.