Hapësira europiane e të dhënave shëndetësore – Shqetësime për rolin e zgjeruar të Amazon, Google dhe Microsoft

Këtë muaj dhe në mars, vendet anëtare të BE-së dhe Parlamenti Europian po zhvillojnë negociata mbi propozimin për të krijuar një Hapësirë Europiane të të Dhënave Shëndetësore – EHDS, me qëllim arritjen e një marrëveshjeje politike përpara zgjedhjeve europiane.

Në qendër të propozimit është gjuha standarde dhe infrastruktura për ofruesit e kujdesit shëndetësor në të gjithë BE-në për të mbledhur dhe përpunuar të dhënat shëndetësore të pacientëve në skedarë dixhitalë, duke përfshirë informacionin mjekësor, rezultatet e testeve dhe recetat e barnave.

Këto të dhëna do të përdoren për kujdesin parësor, si dhe për qëllime dytësore si kërkimi shkencor, krijimi i politikave dhe zhvillimi i produkteve dhe shërbimeve nga kompanitë. Propozimi synon gjithashtu të krijojë një treg të vetëm për produktet dhe shërbimet e shëndetit dixhital, të tilla si sistemet e regjistrimeve elektronike dhe aplikacionet e ‘teleshëndetit’.

Përmirësimi i aksesit për qytetarët e BE-së në të dhënat e tyre mjekësore dhe shkëmbimi më efikas i të dhënave dixhitale ndërmjet ofruesve të kujdesit shëndetësor mund të sjellë përfitime të rëndësishme për sistemet shëndetësore duke parandaluar mbivendosjet. Dhe përdorimi dytësor i të dhënave dixhitale të shëndetit ofron mundësi të rëndësishme për zhvillimin e politikave më të mira të kujdesit dhe barnave ose trajtimeve të reja.

Mirëpo, me këtë propozim BE i hap derën grupeve të teknologjisë si Amazon, Google dhe Microsoft që marrin një rol gjithnjë e më aktiv në fushën e shëndetit dixhital. Hapësira europiane e të dhënave shëndetësore u ofron kompanive të mësipërme një mundësi të paprecedentë për të shtrirë ndikimin e tyre mbi ofruesit e kujdesit shëndetësor, qeveritë dhe pacientët dhe për të rritur fuqinë e tyre tashmë alarmante të madhe të tregut.

Propozimi është në kundërshtim të plotë me përpjekjet për të kufizuar këtë fuqi të tepruar – dhe kërcënimet shoqëruese për ekonomitë dhe demokracinë evropiane – përmes legjislacionit të ri të BE-së si Akti i Shërbimeve Dixhitale dhe Aktit të të Drejtave Dixhitale. Për gjigantët amerikanë të teknologjisë, shëndetësia dhe shërbimet e tij janë një burim i madh i të dhënave të vlefshme, që mund të kthehen në fitime.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.