Hiqen tarifat për kamionët e Kosovës, Serbisë e RMV – Shqipëria, hap e para ‘Ballkanin e Hapur’!

Përmes një vendimi që tashmë ka hyrë në fuqi, Qeveria Shqiptare ka hequr tarifat për parkimin, plumbçet dhe peshimin në doganat tona të mjeteve serbe, kosovare, si dhe nga ato të Maqedonisë së Veriut. Vendimi vjen pak pas katër marrëveshjeve të reja të nënshkruara në Kuadrin e Ballkanit të Hapur, ashtu si dhe pas mbledhjes së dy Qeverive Shqipëri-Kosovë

Marrëveshjet për Ballkanin e Hapur kanë nisur tashmë të zbatohen në praktikë. Ka hyrë në fuqi këtë jave, menjeherë me publikimin në Fletoren Zyrtare një prej pikave të marrëveshjes, e cila parashikon heqjen e tarifave për disa shërbime doganore. Vendimi është miratuar nga Qeveria Shqiptare më datë 27 qershor, dhe tashmë është në fuqi, ndërkohë që në të është përfshirë edhe Kosova, e cila nuk është pjesë e marrëveshjes për Ballkanin e Hapur, ndërkohë që nuk përfshin Malin e Zi.

Bëhet fjalë për një ndryshim në udhëzimin për “Për përcaktimin e tarifave për kryerjen e shërbimeve të veçanta dhe administrimin e tyre nga autoritetet doganore” të vitit 2019. Qeveria ka shtuar një pikë në Udhëzim, i cili përjashton nga aplikimi i tarifave mjetet nga këto tre shtete.

Operatorët ekonomikë me mallrat me origjinë nga Republika e Serbisë, Republika e Maqedonisë së Veriut, si dhe nga Republika e Kosovës trajtohen me tarifë zero, për kryerjen e shërbimeve të veçanta sipas aneksit 1, të pikës 1, të lidhura me: a) parkimin në ambientet që administrohen nga autoritetet doganore; b) shtypshkrimet/plumbçet doganore; c) peshimin e mjeteve të transportit”.

Vendimi i Qeverisë Shqiptare vjen më pak se një muaj nga Samiti i Ohrit, ku u nënshkruan katër marrëveshje të reja, por edhe pas mbledhjes së përbashkët me Qeverinë Kosovare.

Në Samitin e Ballkanit të hapur u firmosën disa marrëveshje bashkëpunimi mes vendeve, në fushën e arsimit, kulturës, turizmit dhe administratës tatimore. E para sishte një marrëveshje për bashkëpunim në Ballkanin Perëndimor në fushën e njohjes reciproke të diplomave dhe gradave shkencore. E dyta, një Memorandum Mirëkuptimi për Bashkëpunimin kulturor. E treta Memorandum Mirëkuptimi për Bashkëpunimin në fushën e turizmit. Dhe e katërta -Memorandum Mirëkuptimi për Bashkëpunimin e administratave tatimore.

Lorenc Rabeta / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.