Huaja e papërdorur e pandemisë, 400 milionë euro rezervë për Shqipërinë – BQE zgjat marrëveshjen me BSH, fondi mund të përdoret ku ka nevojë për likuiditet

Banka e Shqipërisë dhe Banka Qendrore Europiane kanë zgjatur deri në janar 2024 një marrëveshje ekzistuese për sigurimin e likuiditetit. Në marrëveshjen fillestare të vitit 2020 dhe rinovuar në vitin 2021 parashikohet mbështetje për Bankën e Shqipërisë me një linjë likuiditeti në vlerën 400 milionë euro.

Bëhet fjalë për një shumë rezervë e cila mund të përdoret në çdo moment kur Banka e Shqipërisë mund të ketë nevojë për likuiditet.

Pavarësisht se deri tani kjo marrëveshje huaje e kolateralizuar (REPO) nuk ka qenë e nevojshme të përdoret, Banka e Shqipërisë vlerëson se ky instrument rezervë mbetet i dobishëm në kuadër të pasigurive të shtuara,  që vijnë nga vazhdimi i luftës së Rusisë në Ukrainë, në ekonominë globale dhe tregjet financiare.

Kjo lloj marrëveshje për krijimin e linjave të likuiditetit është krijuar që në vitin 2020 për t’u garantuar likuiditet në euro Bankave Qendrore në zonat ku nuk përdoret monedha e përbashkët evropiane për shkak të vështirësive të shkaktuara nga Pandemi Covid 19, e aktualisht nga problemet që ka shkaktuar konflikti në Ukrainë.

Lorenc Rabeta / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.