Hungaria, në kërkim të mjekëve! – Të shumtë ata që largohen nga vendi për një pagë më të mirë

Pavarësisht përpjekjeve të qeverisë hungareze, personeli mjekësor po largohet nga vendi në kërkim të një page më të mirë dhe kushteve të punës më të pranueshme. Shumë prej tyre po kërkojnë të transferohen, ose po kërkojnë punë në vendet e Europës Perëndimore, duke e lënë sistemin shëndetësor hungarez të përballet me struktura që kanë mungesë të theksuar personeli.

Një vit më parë më shumë se 800 mjekë hungarezë kërkuan një certifikatë për të pasur të drejtën e ushtrimit të profesionit të tyre jashtë vendit. Sipas të dhënave zyrtare numri total i certifikatave të tilla të lëshuara, ka arritur 8.500 në 10 vitet e fundit.

Kjo mund të krijojë një situatë emergjence në një vend me pak më shumë se 33 mjekë për një popullsi prej 9.7 milionë banorësh. Thënë ndryshe 3.5 mjekë për cdo një mijë banorë, një shifër më e ulët se mesatarja 3.9 e Bashkimit Europian.

Në vitin 2022, repartet e spitaleve hungareze janë mbyllur për një total prej më shumë se 46 mijë ditësh. Një e treta e kësaj periudhe – 15 mijë ditë – ishte pasojë e mungesës së personelit, ndërsa 8% për shkak të mungesës së materialeve kryesore.

Sipas drejtorisë së përgjithshme kombëtare për spitalet, Hungaria nuk po përballet aktualisht me një emigracion sistematik të personelit të saj shëndetësor. Madje sipas saj numri i mjekëve që punojnë në 102 spitale të vendit është rritur me 10% që nga viti 2010.

Por nga ana tjetër të dhënat e një kompanie sigurimesh shëndetësore, tregojnë se në mars të këtij viti rreth 40 mijë persona ishin në pritje të një ndërhyrjeje kirurgjikale, me kohën e pritjes që shënonte rekorde të reja.

Sipas të dhënave nga sindikata e mjekëve, cdo vit tre mjekë dhe dy infermierë largohen nga Hungaria duke zgjedhur kryesisht Austrinë dhe më shumë se 200 mjekë aktualisht janë regjistruar në Mbretërinë e Bashkuar. Ndërsa vitet e fundit ndër vendet e përzgjedhura renditet dhe Suedia.

Në vitin 2020, qeveria, e kryeministrit nacionalist Viktor Orbán, shpenzoi vetëm 7.3% të PBB-së për kujdesin shëndetësor krahasuar me një mesatare të BE-së prej 10.9%. Shteti prezantoi një rritje pagash prej 11% për punonjësit e kujdesit shëndetësor në shkurt 2023, që do të thotë se mjekët jouniversitarë tani paguhen 1.800 euro bruto në muaj. Një e treta e asaj që shumë prej tyre fitojnë jashtë vendit.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.