I nxehti kërcënon sigurinë ushqimore në planet – Shkencëtarët paralajmërojnë për aftësinë e prodhimit të natyrës

Valët e njëpasnjëshme të të nxehtit kërcënojnë aftësinë e natyrës për të na siguruar ushqim, thonë studiuesit, pasi paralajmëruan për një “vdekje të padukshme, të heshtur” në oqeanet tona mes temperaturave rekord që djegin tokën.

Valët e të nxehtit po godasin Europën, SHBA-në dhe Kinën, me ditën më të nxehtë globale të regjistruar ndonjëherë në fillim të korrikut, duke rrezikuar jetën e njerëzve, si dhe tokën dhe detin nga i cili varet.

Sipas ekspertëve, sistemi ynë ushqimor është global dhe ekzistojnë rreziqe në rritje të humbjeve të njëkohshme të mëdha të të korrave në rajone të ndryshme në botë, gjë që do të ndikojë realisht në disponueshmërinë dhe çmimet e ushqimit. Kjo mund të mos jetë panorama e momentit, por në dekadat e ardhshme është një nga gjërat që na trembin vërtet.

Si qenie njerëzore, nëse je mjaftueshëm i pasur, mund të futesh brenda dhe të ndezësh kondicionerin. Por, ekosistemet natyrore dhe ato bujqësore nuk mund ta bëjnë këtë.

Vala e nxehtësisë europiane e vitit 2018 çoi në dështime të shumta të të korrave dhe humbje të rendimentit deri në 50% në Europën Qendrore dhe Veriore. Në vitin 2022, temperaturat rekord në Mbretërinë e Bashkuar thanë frutat dhe perimet.

Valët e të nxehtit pritet të bëhen 12 herë më të shpeshta deri në vitin 2040 krahasuar me nivelet e para ngrohjes. Megjithëse një valë e të nxehtit mund të mos vrasë një ekosistem, ngjarjet më të gjata dhe më të shpeshta do të nënkuptojnë se natyra nuk ka kohë për t’u rikuperuar.

Njerëzit në përgjithësi janë të izoluar nga efektet e motit nga i cili ne të gjithë varemi. Ekspertët shprehen se shpesh njerëzit mendohen për ndikimet në ekosistemet në tokë, sepse është e lehtë për t’u parë. Por, në përgjithësi nuk mendojnë për valët e të nxehtit detar. Kjo është ajo që duhet të shqetësojë vërtet, ajo është “vdekje e padukshme, e heshtur.”

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.