Inflacioni mbështet bursat europiane – Rritja e çmimeve në Eurozonë ngadalësohet në 2.4% për nëntorin

Bursat europiane po qëndrojnë në rritje edhe në sesionin e sotëm, pasi investitorët reaguan ndaj të dhënave mjaft pozitive për Eurozonën, që treguan se presionet inflacioniste po zbehen.

Sipas të dhënave të Eurostat, inflacioni në Eurozonë rezultoi në 2.4% me bazë vjetore për nëntorin, nga 2.7% që parashikonin analistët e anketuar nga Reuters. Ndërsa në tetor, inflacioni ishte në 2.9%. Indeksi pan-Europian Stoxx 600 po qëndron në rritje me 0.3% të vlerës, pranë nivelit më të lartë në 10 muajt e fundit.

Sektori i naftës dhe gazit po realizon performancën më të mirë, në rritje me 1.6%, ndërsa investitorët ishin në pritje të takimit të OPEC dhe aleatëve të tjerë, me në krye Rusinë, ku do të diskutohen kuotat e prodhimit. Më herët, të dhënat ekonomike treguan se inflacioni në Francë u ngadalësua në 3.4% me bazë vjetore në nëntor, nga 4% që ishte në tetor.

Të dhënat mbi Prodhimin e Brendshëm Bruto për tremujorin e tretë për Francën, të publikuara gjithashtu të enjten, pasqyruan një rënie prej 0.1%. Edhe në sesionin e kaluar, bursat europiane u mbyllën në rritje, pasi inflacioni në Gjermani u ngadalësua në 2.3% për nëntorin, nga 2.6% që parashikonin analistët.

Gjithashtu, investitorët do të jenë të fokusuar edhe te samiti mbi klimën, COP28 që fillon ditën e sotme në Emiratet e Bashkuara Arabe. Prej gati tre dekadash, qeveritë nga mbarë bota janë mbledhur pothuajse çdo vit, për të dhënë një përgjigje globale ndaj emergjencës klimatike.

Sipas Konventës të OKB-së të vitit 1992 për ndryshimet klimatike, çdo vend është i detyruar me traktat të shmangë ndryshimet e rrezikshme klimatike dhe të gjejë mënyra për të reduktuar emetimet e gazeve serrë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.