“Inflacioni në Europë mund të rritet dhe më shumë” – Arsyeja kryesore sipas FMN është përshkallëzimi i konfliktit në Lindjen e Mesme

Fondi Monetar Ndërkombëtar paralajmëroi se konflikti në Lindjen e Mesme midis Hamasit dhe Izraelit mund të rrisë inflacionin në një kohë që bankat qendrore vazhdojnë përpjekjet për ta ulur atë. Drejtori i Departamentit për Europën në FMN, Alfred Kammer, tha se inflacioni mund të befasojë në rritje. Ai theksoi se konflikti Izrael-Gaza ka ndikuar tashmë në çmimet e energjisë, gjë që mund të rrisë inflacionin në Europë në përgjithësi.

Sipas tij, ndikimi fillestar në çmimet e naftës tani është kthyer plotësisht. Ndërsa rritja e çmimit të gazit natyror ishte me 10%. Konflikti ka pasur një ndikim të kufizuar deri më tani në ekonomitë europiane në anën e çmimeve dhe ndikimi i mëtejshëm do të varet nga kohëzgjatja dhe intensiteti i konfliktit në Lindjen e Mesme. Nëse vazhdon si tani, ndikimi do të mbetet i kufizuar në Europë.

Luhatja e çmimeve vazhdon të vëzhgohet me kujdes nga investitorët për shkak të implikimeve të rritjes së mundshme të çmimeve të naftës në luftën kundër inflacionit.

Kammer tha se nuk po parashikohet një recesion në Eurozonë në vlerësimet e bëra. Por shihet rritje të qëndrueshme gjatë vitit 2023 dhe një rikuperim i dobët në 2024 ën.

Ai gjithashtu vuri në dukje sesi kontinenti e ka kapërcyer pandeminë COVID-19 dhe e ka përballuar goditjen energjetike të shkaktuar nga lufta, më mirë se sa pritej.

Sipas Kammer, rritja po ngadalësohet këtë vit, pjesërisht duke reflektuar faktin që bankat qendrore kanë rritur normat e interesit për të luftuar inflacionin e lartë të shkaktuar nga goditjet e çmimeve të energjisë dhe ushqimeve. Ka pasur sukses në frontin e inflacionit dhe shumica e Europës nuk pritet të bjerë në recesion.

Kammer më tej vuri në dukje erërat kundër rritjes ekonomike, duke përfshirë fragmentimin gjeo-ekonomik dhe çmimet e larta të energjisë. Këto sipas tij, i shtohen erërave më të vjetra – nga rritja e ulët e produktivitetit dhe një fuqi punëtore në plakje. Ndërsa tranzicioni i gjelbër dhe ai dixhital paraqesin sfida shtesë.

Perspektiva për Europën është për një ulje të butë, me një rënie graduale të inflacionit. Rritja në përgjithësi në rajon pritet të ngadalësohet në 1.3% në 2023 nga 2.7% vitin e kaluar dhe të përmirësohet në 1.5% në 2024. Brenda ekonomive të përparuara europiane, ekonomitë e orientuara nga shërbimi do të rimëkëmben më shpejt se ato me sektorë prodhimi relativisht më të mëdhenj, me të cilat përballen kërkesa e jashtme e ulët dhe janë më të ekspozuar ndaj çmimeve të larta të energjisë, thuhet në raportin e FMN-së.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.