Investimet për menaxhimin e mbetjeve – Kredia 50 mln euro, ndërhyrje në 5 zona, MIE: Nuk ka plane për inceneratorë

Komisioni parlamentar i Veprimtarive Prodhuese ka miratuar marrëveshjen e huasë prej 50 mln euro për programin për menaxhim të qëndrueshëm dhe miqësor me klimën në sektorin e mbetjeve të ngurta, që parashikon financimin e ndërtimit të infrastrukturës së menaxhimit të integruar të mbetjeve, për zonat e mbetjeve Dibër, Tiranë-Durrës, Berat, zona veriore e rajonit Vlorë dhe Korçë.

Gjatë diskutimeve në komision, deputetët e opozitës kërkuan informacion mbi parashikimet për ndërtimin e inceneratorëve edhe në zona si Vlora apo Dibra, por përfaqësuesit e Ministrisë së Infrastrukturës dhe Energjisë bënë me dije se nuk ka një projekt të tillë.

Objektivat e projektit mbulojnë tri akset e zhvillimit të qëndrueshëm të menaxhimit të mbetjeve dhe përmirësimit të mjedisit: Boshti social, ai mjedisor, si dhe boshti ekonomik, që nënkupton rritjen e performancës operative dhe financiare nëpërmjet ofrimit të shërbimit me tarifa të përballueshme, duke gjeneruar të ardhura nëpërmjet riciklimit të materialeve të riciklueshme, që gjenerohen nga mbetjet.

Ola Mitre/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.