Të përndjekurit të likuidohen brenda 4 vitesh, të vendoset kufi – Projekligji, në Kuvend. Me ritmet aktuale dëmshpërblimi zgjat edhe 25 vite të tjerë

Me ritmin aktual, procesi i dëmshpërblimit të ish-të përndjekurve politikë të epokës së komunizmit, mund të zgjasë edhe për 25 vite. Është depozituar tashmë në Kuvend një projektligj, i cili përcakton një plan 4-vjeçar për t’i dhënë fund procesit të dëmshpërblimit.

Ndryshimi, i propozuar nga Deputeti Demokrat Bujar Leskaj, parashikon që në ligjin e vitit 2007 “Për dëmshpërblimin e ish të dënuarve politikë të regjimit komunist”, të bëhet një ndryshim i cili detyron Qeverinë të hartojë një skemë për këtë qëllim. “Në ligjin e buxhetit planifikohen fondet vjetore per zbatimin e këtij ligji. Këshilli i Ministrave, brenda 6 muajve nga hyrja në fuqi e këtij ligji, saktëson faturën financiare të dëmshpërblimit dhe i propozon Kuvendit skemën e shpërndarjes së fondeve.”, përcakton neni 32 i ndryshuar, sipas propozimit të Leskajt.

Në relacionin shoqërues të draftit theksohet se që prej vitit 2007, që ligji për dëmshpërblimin e ish-të përndjekurve hyri në fuqi, kanë kaluar 15 vite dhe aktualisht, sipas të dhënave nga Ministria e Financave dhe Ekonomisë, detyrimet ndaj kësaj shtrese përllogariten në vlerën rreth 30 miliardë lekë. Kjo do të thotë se, me ritmet aktuale (30 miliardë lekë vlera totale/ 1 miliard lekë parashikuar në projekt-buxhetin për vitin 2023, duke prezumuar dhe ndonjë rritje modeste në vitet pasuese), shtetit shqiptar i duhen rreth 25 vjet të tjerë për të përmbushur detyrimet ndaj kësaj shtrese.

Qëllimi i këtij propozimi, thekson relacioni shoqërues, është që, nëpërmjet hartimit të një skeme të shpërndarjes së fondeve me një afat 4-vjeçar, të ndërmerret angazhim serioz për likujdimin e këtij “borxhi” publik ndaj shtresës së ish të pëmdjekurve politikë, deri në përfundim të vitit 2027. Në këtë mënyrë, do t’i jepej fund tejzgjatjes së këtij procesi, deri në kufijtë, e ndoshta në tejkalim, të afateve të arsyeshme e të përshtatshme.

Lorenc Rabeta/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.