Italia sheh tejkalim të deficitit buxhetor për vitin 2023 në rreth 5.5% të PBB-së!

Italia sheh tejkalimin e deficitit buxhetor të vitit 2023 në rreth 5.5% të produktit të brendshëm bruto (PBB) nga objektivi aktual prej 4.5%, sipas Reuters, të shtyrë nga normat e larta të interesit dhe rregullimet e kontabilitetit në lidhje me kreditë e kushtueshme tatimore.

Objektivi prej 3.7% i vendosur aktualisht për hendekun fiskal të vitit të ardhshëm është vendosur gjithashtu të rishikohet lart. Sipas tendencave aktuale, deficiti i vitit të ardhshëm shihet ende nën 4% të PBB-së, por qeveria e kryeministres Giorgia Meloni mund të vendosë një shifër disi më të lartë në mënyrë që të ruajë një hapësirë për të miratuar shkurtimet e premtuara të taksave në buxhetin e 2024.

Financat publike të Italisë kërcënohen nga miliarda euro në stimuj fiskalë për përmirësime në shtëpi, të cilat ka të ngjarë t’i shtohen deficitit të këtij viti, sipas kritereve të përcaktuara nga agjencia e statistikave e Bashkimit Europian, Eurostat.

Ndikimi i këtyre stimujve do të bëhet i qartë në ditët në vijim, kur Eurostat të nxjerrë një vendim se si duhet të përfshihen në llogaritë publike.

Thesari shpresonte se rishikimet e të dhënave ekonomike dhe financave publike të Italisë të publikuara të Premten për 2020-2022 do të kishin dhënë një efekt pozitiv mbartës në financat e këtij viti, raportoi Reuters të hënën.

Megjithatë, byroja kombëtare e statistikave ISTAT tha se çdo rishikim i të dhënave të PBB-së për tremujorin e parë dhe të dytë të këtij viti ka të ngjarë të jetë jo më shumë se margjinal.

Perspektiva për vitin 2024 bëhet veçanërisht sfiduese pas një morie të dhënash të dobëta që hedhin hije mbi perspektivat ekonomike të Italisë.

Thesari vlerëson se Italia mund të rritet ende me 0.9% ose 1% këtë vit, gjerësisht në përputhje me objektivin aktual, por parashikimi prej 1.5% në 2024 ka të ngjarë të rishikohet në 1.1 ose 1.2%, thanë burimet.

Italia do të zbulojë parashikimet e saj të reja ekonomike javën e ardhshme në Dokumentin vjetor Ekonomik dhe Financiar të Thesarit (DEF).

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.