Kanadaja, rekord leje qëndrimi për emigrantët – Më shumë se 437 mijë rezidenca të përhershme në 2022

Kanadaja vendosi një rekord për sa i përket emigracionit në vitin 2022, duke u dhënë të huajve më shumë se 437 mijë leje qendrimi të përhershme. Shifra u konfirmua nga qeveria e vendit duke sqaruar se synonte rritjen e emigracionit për të luftuar një treg të ngushtë pune.

Në fakt qeveria kishte vendosur një objektiv për të mirëpritur mbi 431 mijë banorë të rinj të përhershëm në vitin 2022, dhe ministra e emigracionit tha se Kanadaja e ka arritur këtë objektiv, duke shënuar një rekord për sa i përket shifrës më të madhe vjetore të njerëzve të mirëpritur në historinë kanadeze.

Kjo shifër është rreth 9% më e lartë se ajo në vitin 2021, kur Kanadaja tejkaloi rekordin e mëparshëm të vendosur në 1913-shin, dhe vjen pasi vendi synon të sjellë 1.45 milion banorë të rinj të përhershëm deri në fund të vitit 2025.

Emigracioni është një pikë e rëndësishme e zgjidhjes së problemit të mungesës akute në tregun e punës në vend. Personat me leje të përhershme qëndrimi zakonisht mund të aplikojnë për marrjen e shtetësisë pas pesë vitesh.

Emigracioni përbën pothuajse 100% të rritjes së fuqisë punëtore të Kanadasë dhe deri në vitin 2036 emigrantët do të përfaqësojnë deri në 30% të popullsisë së Kanadasë, nga 20.7% në 2011-ën. Qeveria e kryeministrit Justin Trudeau është mbështetur tek imigracioni për të nxitur ekonominë kanadeze dhe për të mbështetur një popullsi në plakje, që nga ardhja në pushtet në 2015-ën.

Mungesa e punëtorëve të kualifikuar në industri si kujdesi shëndetësor është akute dhe të dhënat më të fundit zyrtare tregojnë se kishte 871.300 vende të lira pune në tetor, nga një nivel rekord prej mbi një milion vendesh të hapura në Kanada në maj.

Për të zgjidhur këtë situatë, Otava po planifikon shorte të përcaktuara për emigrantët e aftë për herë të parë në vitin 2023, duke lejuar zgjedhjen e aplikantëve me aftësitë më të kërkuara për rajonet e vendit që kanë më shumë nevojë për punëtorë.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.