Kapaciteti i gazit nga TAP – ERE miraton vendimin/ Testim tregut për zgjerimin e kapacitetit në pikat e interkonjeksionit  

Enti Rregullator i Energjisë ka miratuar Udhëzuesin e vitit 2023 për Testimin e Tregut të Gazsjellësit Trans Adriatik, që synon zgjerimin e kapacitetit në pikat e interkonjeksionit të vendeve ku kalon tubacioni e ku përfshihet edhe Shqipëria.

Vendimi i ERE-s bazohet në Opinionin e Përbashkët, ku TAP AG duhet rregullisht (të paktën çdo dy vjet) të kryejë një Testim Tregu me qëllim që t’u ofrojë të gjitha palëve të interesuara kapacitetet shtesë derisa të arrihet mundësia maksimale e zgjerimit të tubacionit. Udhëzimet 2023 marrin parasysh nevojën për të siguruar koordinimin e duhur me Testimin e Tregut 2021, që është ende i hapur. Më herët, Enti Rregullator i Energjisë ka bërë me dije se projekti i rritjes së kapacitetit parashikon katër nivele të mundshme zgjerimi, në varësi të nivelit të rezervimit, duke çuar në një zgjerim të mundshëm të plotë deri në 27 MSm3/D.

Procesi i rritjes së kapacitetit të TAP synon shpërndarjen e kapaciteteve rritëse afatgjata në pikat ekzistuese ose të reja të ndërlidhjes përgjatë gjurmës së TAP dhe do të rrisë vëllimet e gazit të importuar në Europë. Pikat e Interkonjeksionit në fjalë janë: Kipoi, Komotini dhe Nea Mesimvria, në Greqi, Kuçovë, Relievi Rosckovec dhe Fier në Shqipëri dhe Melendugno në Itali. TAP është pjesë e Korridorit Jugor të Gazit, që transporton gaz natyror në Europë nga fusha e Shah Deniz II në Azerbajxhan.

Duke u lidhur me gazsjellësin Trans Anatolian në kufirin greko-turk, TAP kalon Greqinë Veriore, Shqipërinë dhe Detin Adriatik përpara se të dalë në breg në Italinë Jugore për t’u lidhur me rrjetin italian të gazit natyror. TAP nisi operimet tregtare në nëntor të vitit 2020.

Ola Mitre / SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.