Kapitali bankar, shqiptarët drejt dominimit, të parët turqit – Si ndryshoi struktura. Në rritje hungarezët, tkurren grekët

Viti 2023 e ka gjetur sistemin bankar shqiptar me ndyshime rrënjesore sa i përket strukturës së kapitalit. Një e katërta e këtij kapitali tashmë është me origjinë shqiptare. Sipas të dhënave zyrtare të bankës së Shqipërisë, kapitali aksionar i sistemit bankar në 31 dhjetor të vitit 2022, arriti në vlerën 184.27 miliardë lekë, me një rritje prej rreth 8.94 miliardë lekë, ose 5.1% kundrejt një viti më parë. Struktura e kapitalit vijon të dominohet nga kapitali i huaj, i cili, në fund të vitit 2022, përfaqëson rreth 75.12% të kapitalit të paguar të sistemit bankar, me një rënie prej rreth 0.82 pikë përqindjeje kundrejt fundit të vitit 2021.

Kapitali turk vijon të dominojë sistemin bankar duke zënë 27.52% të totalit. Ndërkohë që në vend të dytë tashmë është ngjitur kapitali me origjinë shqiptare, i cili  zë në fund të vitit të shkuar 25.7 të totalit. I treti për nga pesha është kapitali austriak, që zë 17.7% të totalit.

Kapitali italian zë rreth 12.5%, ndërkohë që në rritje të fortë për vitin e shkuar ka ardhur dhe kapitali hungarez. Në rënie ka ardhur pesha e kapitalit me origjinë nga shteti grek, ndërkohë që peshë më modeste kanë kapitalet me origjinë gjermane apo nga vende të tjera të BE-së.

Gjatë vitit 2022, aktivet e sistemit bankar shënuan një rritje prej rreth 104.02 miliardë lekësh ose 5.87%, përkundrejt rritjes me 192.47 miliardë lekë ose 12.18% të një viti më parë. Portofoli i kredive ka pasur rritje me 43.96 miliardë lekë ose 6.55%, gjatë këtij viti.

Lorenc Rabeta/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.