KE u jep para kompanive që harxhojnë më shumë energji elektrike – Një fond 1.36 miliard euro për kompensimin e kostos së lartë

Një shumë prej 1.36 miliardë eurosh është miratuar nga Komisioni Europian për kompensimin e kompanive që harxhojnë më shumë energji elektrike, për cmimin e lartë të energjisë elektrike si pasojë e kostos së emetimeve të karbonit. Shuma mbulon periudhën 2021-2030 dhe do të përfitojnë kompanitë që operojnë në sektorët e çelikut, aluminit, bakrit, rafinimit dhe letrës që janë të ekspozuara ndaj konkurrencës ndërkombëtare. Masa mbështetëse synon të kufizojë rrezikun e “rrjedhjes së karbonit”, pra transferimin e prodhimit të kompanive në vendet jashtë BE-së. Kompensimi do t’u jepet kompanive përmes një rimbursimi të pjesshëm të kostove indirekte të emetimeve të bëra vitin e kaluar.

Pagesa përfundimtare do të bëhet në vitin 2031. Madje Komisioni miratoi pagesën retroaktive të subvencioneve për vitin 2021 më 30 prill 2023, duke pranuar kohën e nevojshme për hartimin e planit dhe rrethanat e jashtëzakonshme që lidhen me krizën aktuale energjetike. Parakusht për pagesën e subvencioneve janë objektivat për kursimin e energjisë përmes tri masave alternative. Konkretisht, përfituesit, në mënyrë që të kenë të drejtë për kompensim, duhet ose të zbatojnë rekomandime të caktuara të auditimit të energjisë, ose të mbulojnë të paktën 30% të konsumit të energjisë elektrike me burime të rinovueshme, ose të investojnë të paktën 50% të shumës së ndihmës në projekte që rezultojnë në një reduktim të ndjeshëm të emetimeve të gazeve serrë të objektit. Përfituesit duhet të përmbushin një nga detyrimet e mësipërme brenda tre viteve nga dhënia e ndihmës.

Shuma maksimale e ndihmës për përfitues është vendosur në 75% të kostos së emetimeve të karbonit. Megjithatë, sipas vendimit të komisionit europian, në disa raste shuma maksimale e ndihmës mund të jetë më e lartë për të kufizuar koston e emetimeve në 1.5% të vlerës së shtuar bruto të kompanisë. Shuma e ndihmës llogaritet në bazë të standardeve të efiçencës së energjisë, në mënyrë që përfituesit të inkurajohen të kursejnë energji. Masa e kompensimit është pjesë e udhëzimeve të rishikuara të ndihmës shtetërore të nxjerra nga komisioni europian në shtator 2021, dhe do të zbatohet deri në vitin 2030, me një përditësim të përkohshëm të disa elementeve në 2025 – ën.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.