KESH blen rreth 4.1 milionë euro energji në bursë – Procedura është bërë për datat 18 deri në 24 shtator. U siguruan 42 mijë MWh

Si pasojë e tejzgjatjes së motit të thatë, Korporata Elektronenergjetike Shqiptare është detyruar të blejë këtë javë në bursë 42 mijë MWh energji për një vlerë rreth 4.1 milionë euro. Është vetë KESH që bën me dije se çmimi mesatar për këtë blerje rezultoi 98,96 euro për MWh.

Blerja është bërë për datat 18 deri në 24 shtator dhë është një ndër blerjet e pakta të KESH për këtë vit, falë situatës së mirë hidrike që ka mbajtur lart nivelet e baseneve të hidrocentraleve. Procedurat e fundit të zhvilluara nga KESH sa i takonin blerjes së energjisë i përkasin fundit të korrikut dhe fillimit të gushtit kur u pagua afërisht e njëjta sasi parash.

Si rrjedhojë e situatës së mirë hidrike kryesisht në Kaskadën e Drinit gjatë gjysmës së parë të vitit, Korporata Elektroenergjetike Shqiptare arkëtoi 40.4 mln euro nga shitja e energjisë. Çmimi mesatar me të cilin u shit energjia përgjatë periudhës janar – qershor arriti në 82.92 euro/mËh.

Sipas të dhënave zyrtare, uji në liqenin e Fierëz arriti mbi nivelet historike përgjatë periudhës janar – qershor të këtij viti. Vetëm në muajin qershor niveli në këtë liqen arriti në 296.3 m apo 7 metra më shumë se mesatarja historike, si dhe duke tejkaluar edhe maksimalen që është shënuar për këtë muaj në 30 vitet e fundit.

Lorenc Rabeta/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.