Klientë në nevojë për gazin, pa treg funksional – Ministria, gati projektvendimin. “Harrohet” statusi për energjinë elektrike

Pavarësisht se Shqipëria nuk ka ende një treg funksional të gazit natyror, Ministria e Infrastrukturës dhe Energjisë ka gati projektvendimin për statusin e klientit të nevojë për furnizimin me gaz natyror.

Këtu përfshihen klientët familjarë, të cilët për shkak të gjendjes sociale, do të duhet të gëzojnë disa të drejta të veçanta, lidhur me furnizimin me gaz, që nënkupton kompensim të shpenzimeve për konsumin e gazit natyror.

Sipas draftit, të siguruar nga TV SCAN mbështetja financiare varion nga 50% në 100% të kostove të konsumit, në varësi të kategorisë që i përket klienti që do të kategorizohet në nevojë. Këtu përfshihen familjet përfituese të ndihmës ekonomike dhe fondit 6%, familjet që kanë anëtarë persona me aftësi të kufizuar, pensionistët, invalidët e punës, si dhe të verbrit, që gjithsesi do të duhet të vërtetojnë gjendjen e të ardhurave të ulta, në raport me pagën minimale në fuqi.

Dokumenti specifikon se ky vendim do të jetë i aplikueshëm vetëm në momentin kur në Shqipëri do të jetë funksional tregu i gazit natyror. Por, teksa Ministria e Infrastrukutrës dhe Energjisë po avancon me hartimin e akteve nënligjore të nevojshme për sektorin e gazit, ndryshe paraqitet situata për energjinë elektrike.

Miratimi i një vendimi të zgjashëm është detyrim ligjor, që prej vitit 2015, por deri më tani nuk është hedhur asnjë hap në këtë drejtim, duke bërë që mijëra familje në vështirësi ekonomike të mos përfitojnë kompensim. Sipas ligjit, ministria përgjegjëse për çështjet sociale në bashkëpunim me atë të energjisë duhet të hartojnë procedurat për përftimin e statusit të klientit në nevojë, ndërkohë që më herët janë ndërmarrë edhe peticione e protesta për këtë qëllim, por deri më tani vendimi nuk është miratuar.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.