Korça, qarku “model” për zhvillimin e turizimit – “Themelet” te bujqësia, kryeson listën për volumin e prodhimit të pemëve frutore

Ekonomia e Qarkut Korçë i ka themelet në zhvillimin bujqësor, duke u karakterizuar si qarku me volumin më të madh të prodhimit të pemëve frutore. Gjithsesi, Korça si qendra e qarkut juglindor, i ka dhënë përparësi sektorit të turizmit, duke u shndërruar në një nga destinacionet kryesore për turizmin e brendshëm. Rritja e fluksit të turistëve u pasua edhe me rritjen e numrit të strukturave akomoduese, duke e bërë Korçën, qarkun me rritjen më të lartë, në raport me 11 qarqet e tjerë të vendit. Po ashtu, numri i njësive ligjore aktive është një nga më të lartët në rang vendi, duke u lënë pas vetëm nga Tirana dhe Fieri.

Në total, numri i ndërmarrjeve aktive sipas INSTAT në vitin 2021 në këtë qark ishte 17 690. Një tjetër karakteristikë e këtij rajoni ëhstë shkalla e pjesëmarrjes të lartë në forcat e punës, duke u renditur i dyti në rang vendi, pas Gjirokastrës. Ndërkohë që, sa i takon papunësisë qarku juglindor qëndron në mes të renditjes, me një shkallë prej 9.7% për 1 000 banorë. Paga mesatare në Qarkun Korçë është 47 915 lekë, duke u lënë pas nga disa qarqe, ndërkohë që shpenzimet mesatare mujore për konsum për njësitë ekonomike familjare janë ndër më të lartat në rang vendi.

Ky tregues është 83591 lekë në muaj, duke u lënë pas vetëm nga Qarku Tiranë. Gjithsesi, edhe ky rajon nuk i ka shpëtuar largimit të popullsisë, teksa migrimi i brendshëm është ndër më të lartët në rang vendi. I ndarë sipas bashkive, migrimi neto më i lartë në këtë qark shënohet në Pogradec dhe Maliq, ndërsa pas tyre vijnë Kolonja, Devolli dhe Pusteci. Përjashtim bën vetëm Bashkia Korçë, që këtë tregues e ka në vlera pozitive.

Ola Mitre / SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.