Kostot e tranzicionit global të energjisë – 1 milion vende pune të humbura në industrinë e qymyrit

Rreth 1 milion vende pune në industrinë globale të qymyrit parashikohet të mbyllen deri në vitin 2050 edhe pa ndonjë premtim të mëtejshëm për të hequr gradualisht karburantet fosile, me Kinën dhe Indinë që përballen me humbjet më të mëdha.

Qindra miniera me aktivitet intensiv pritet të mbyllen në dekadat e ardhshme, pasi ato do të arrijnë fundin e jetëgjatësisë së tyre dhe vendet do të zëvendësojnë qymyrin me burime më të pastra të energjisë me karbon të ulët.

Por, shumica e minierave që ka të ngjarë të mbyllen ‘nuk kanë ndonjë plan për të zgjatur aktivitetin ose për të menaxhuar një tranzicion në një ekonomi pas qymyrit’, paralajmëroi instituti me qendër në SHBA ‘Global Energy Monitor’. Sipas ekspertëve, qeveritë duhet të hartojnë plane për të siguruar që punëtorët të mos vuajnë nga tranzicioni i energjisë.

Instituti shqyrtoi 4.300 projekte aktive dhe të propozuara të minierave të qymyrit në mbarë botën që mbulojnë një fuqi punëtore totale prej afro 2.7 milionë dhe zbuloi se më shumë se 400 mijë punëtorë janë të punësuar në miniera që nuk do të jenë më aktive brenda vitit 2035.

Nëse do të zbatoheshin planet për të hequr gradualisht qymyrin për të kufizuar ngrohjen globale në 1.5 gradë Celsius, vetëm 250 mijë minatorë – më pak se 10% e fuqisë punëtore aktuale – do të gjenin punë në mbarë botën.

Industria kineze e qymyrit, më e madhja në botë, aktualisht punëson më shumë se 1.5 milionë persona. Nga 1 milion humbje të vendeve të punës globale deri në vitin 2050, më shumë se 240 mijë do të jenë vetëm në provincën e Shanxi.

Sektori i qymyrit në Kinë ka pësuar tashmë disa valë ristrukturimi në dekadat e fundit, me shumë rrethe minerare në veri dhe verilindje që luftojnë për të gjetur burime alternative të rritjes dhe punësimit pas mbylljes së minierave.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.