KPP arkëton 62 mln lekë nga Operatorët Ekonomikë – Për çfarë ankohen më shumë te Prokurimet Publike?

Komisoni i Porkurimeve Publike ka arkëtuar 62 milionë lekë tarifa financiare të ardhura si garanci nga ankesat e operatorëve ekonomikë në 7 muajt e parë të këtij viti. Të dhënat e Buletinit Mujor raportojnë se vetëm për muajin korrik janë arkëtuar rreth 10 milionë lekë.

Por duke ju referuar këtyre të dhënave, Korriku duket se është muaji që numri i ankesava për prokurimet publike është rritur më shumë në të gjithë 7 mujorin e 2023. Sipas Buletinit Mujor të Komisionit të Prokurimit Publik, ankesat janë regjistruar 107 në total, ku thuajse të gjitha janë adresuar për procedura të prokurimit publik, e vetëm një për procedura ankandi.

Ndërsa për ankesat sipas fazës së procesit për të cilën është paraqitur ankimi janë 56 për Dokumentet Standarde të Tenderit (DST) dhe 51 për vlerësim ofertash.

Duke i krahasuar ankesat sipas llojit të kontratës, 66 ankesa janë adresuar për mall, 35 për shërbime e për punë publike vetëm 6 të tilla. Por me 84 vendime të Komisionit të Prokurimeve Publike janë shqyrtuar dhe zgjidhur 99 ankesa të paraqitura nga operatorët ekonomikë.

Harta e ankesave është shtrirë në disa qarqe, ku si edhe në muajt e kaluar, kryeqyteti kryeson për numrin më të lartë, por pas tij vjen qarku i Durrësit, duke u pasuar me Shkodrën, Vlorën etj.

Diamila Leka/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.