Kryeministri jep detaje mbi samitin në Bruksel – ‘Ftohja e marrëdhënieve me Greqinë”/ Rama: Çështje që duhet ta trajtojmë mes nesh

Një ditë pas samitit Ballkani Perëndimor  – Bashkimi Evropian, kryeministri Rama së bashku me ministrin e Financave Ervin Mete kanë mbajtur një konferencë për shtyp.

“U diskutua perspektiva e vendeve tona drejt BE, u vu në pah procesi i bërë, u fol për procesin e normalizimit të raporteve Kosovë-Serbi dhe më vjen shumë mirë të ndaj me ju faktin se vendet anëtare kanë një vlerësim shumë pozitiv për progresin e Shqipërisë dhe posaçërisht nga Komisioni Evropianë vlerësohet me nota pozitive për skuadrën tonë të negociatave në fazën e parë të skanimit të krejt organizmit shtetëror të Shqipërisë dhe të tregjeve tona. Këto ditë do të organizojë një takim falënderimi dhe motivimi për më tej të anëtarëve të kësaj skuadre, e cila në totalin e vet, po të marrin negociatorët, të marrim prezantuesit dhe kontribuuesit, është rreth 1000 vetë, ku përfshihen jo vetëm institucionet e ekzekutivit, por edhe institucionet e pavarura”, tha Rama.

Rama  ka folur edhe se çfarë u diskutua në Bruksel lidhur me ‘ftohjen e marrëdhënieve me Greqinë’

“Është trajtuar nga ana ime edhe çështja e vështirësisë që prej vitesh krijojnë eksportimet e mosmarrëveshjeve bilaterale mes vendeve në tryezën e BE. Ka një sensibilizim të lartë nga shtetet më me eksperiencë, më me jetëgjatësi në familjen e bashkuar evropiane për mënyrën si çështjet bilateriale të eksportuara nga një vend anëtar krijojnë pengesa të arsyeshme. Është e pakuptueshme që në një proces integrimi një vend hyn në negociata, në një fazë përfundimtare të shtetbërjes evropiane, duke përfituar nga transferimi i dijes nga BE, të pengohet, sepse ka një çështje bilaterale. Kjo pengesë është e paarsyeshme dhe joevropiane në frymë. Rastet dhe historitë kanë qenë shumë, nuk është rastësi që të gjitha këto raste vijnë nga zona e Ballkanit. Aq më tepër kur bëhet fjalë për çështje të natyrës historike, për çështje që s’prekin ndonjë aspekt që prekin parimet e BE-së”.

“Dallimi aktual mes nesh e Greqisë kam nënvizuar se kjo është çështje mes nesh dhe duhet ta trajtojmë mes nesh. Si Shqipëri ne nuk e shohim të lidhur as me procesin e negociatave as me përmbajtjen e marrëdhënieve tona me Greqinë që është partner strategjik dhe vend fqinj që duam të thellojmë bashkëpunimin dhe forcojmë miqësinë duke bërë gjithçka na takon ne. Ne duam të jemi një vend europian në BE, jo një shtet ballkanik në BE” tha Rama.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.