Kthesa e Gjermanisë ndaj emigracionit: A është e nevojshme apo thjesht politikë?

Për shumë, Gjermania është vendi i emigracionit. Më shumë se tre milionë refugjatë dhe azilkërkues jetojnë atje, që është më shumë se në çdo vend tjetër europian. Disa emigrantë tërhiqen nga kërkesa e lartë për punëtorë të kualifikuar dhe përfitimet bujare të Gjermanisë. Por vitin e kaluar, kërkesat për azil u rritën me më shumë se 50 %. Sistemi i pritjes së emigrantëve kaloi në gjendje krize. E djathta ekstreme, mes konsensusit në rritje, akuzoi qeverinë se nuk arriti të përballet me rritjen e të ardhurve.

Si pasojë, kancelari gjerman Olaf Scholz bëri një kthesë historike dhe shtrëngoi masat e emigracionit. Tegel-Berlin, dikur aeroporti kryesor ndërkombëtar i kryeqytetit, u mbyll përgjithmonë në vitin 2020. Autoritetet e kthyen atë në një qendër refugjatësh në vitin 2022, kur mijëra ukrainas, duke ikur nga pushtimi në shkallë të gjerë të Rusisë, filluan të mbërrinin çdo ditë.

Tegel është bërë kampi më i madh i refugjatëve në Gjermani. Rreth 5000 refugjatë dhe azilkërkues aktualisht jetojnë atje. Ai u zgjerua disa herë për të përmbushur kërkesat në rritje dhe tani mund të presë deri në 7000 njerëz. Megjithatë, objekti ka arritur kapacitetin dhe autoritetet thonë se nuk do të konsiderojnë më zgjerimin e mëtejshëm.

Pothuajse 300,000 njerëz aplikuan për azil në Gjermani në vitin 2023, numri më i lartë që nga viti 2015, kur Gjermania pranoi më shumë se një milion refugjatë. Shumica dërrmuese ishin nga Siria, si dhe nga Turqia dhe Afganistani. Rrjedha e vazhdueshme e mbërritjeve ka shtyrë qeverinë të gjejë mjete të tjera akomodimi si hotelet.

Me qendrat e pritjes në gjendje krize, integrimi po bëhet një sfidë e cila po nxit retorikën kundër emigracionit në të gjithë vendin. Vitin e kaluar, partia e ekstremit të djathtë Alternativa për Gjermaninë (AfD) bëri fitore historike në zgjedhjet lokale. Kontrollet kufitare me Poloninë, Zvicrën dhe Republikën Çeke janë tashmë në vend. Përfitimet për azilkërkuesit pritet të shkurtohen ndërsa dekurajimi i të ardhurve të rinj është linja e re e politikës.

“Me këto shifra vërtet të mëdha dhe gjithashtu gjithë këtë ndjenjë, që kanë shumë njerëz në elektorat, se po humbasin kontrollin, diskursi u trazua shumë më tepër”, shpjegoi David Kipp, një ekspert i migracionit për Institutin Gjerman për Çështjet Ndërkombëtare dhe të Sigurisë. SWP.

Megjithë kundërshtimin në rritje ndaj emigracionit, më shumë se një milion njerëz dolën në rrugët e Gjermanisë në janar dhe protestuan kundër të djathtës ekstreme.

Demonstratat pasuan zbulimet e një komploti të dyshuar midis anëtarëve të AfD dhe neo-nazistëve për të dëbuar miliona emigrantë, duke përfshirë disa me nënshtetësi gjermane. Demonstratat ndikuan në zgjedhjet lokale të janarit dhe AfD pësoi një disfatë të ngushtë ndaj partisë konservatore të opozitës. Megjithatë, partitë në koalicionin e semaforëve të Scholz janë ende shumë prapa AfD në sondazhe.

​Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.