Ky vend europian mund të jetë prodhuesi tjetër më i madh i verës!

Skandinavia nuk është saktësisht ajo që njohësit do ta përkufizonin si vend kryesor të verës. Por me ndryshimin e klimës që bën sezone më të ngrohta dhe më të gjata të rritjes, dhe varietetet e reja të rrushit të përshtatura me këtë peizazh, prodhimi i verës suedeze po fiton terren.

Ndërsa thatësira, nxehtësia në rritje dhe ngjarje të tjera ekstreme të motit po i detyrojnë rajonet tradicionale të rritjes së verës të rivlerësojnë metodat e tyre, prodhimi i verës suedeze po zhvendoset nga amatorët kryesisht në shkallë të vogël në një industri me ambicie në rritje.

Kullabergs Vingård është një vresht dhe punishte vere në pararojë të prodhuesve që kërkojnë të ripërcaktojnë se çfarë mund të jetë vera suedeze.

E shtrirë mbi 14 hektarë, shumica e hardhive të saj u mbollën më pak se një dekadë më parë. Deri në vitin 2022, kantina e verës kishte arritur një prodhim vjetor prej mbi 30,000 shishe – kryesisht të bardha që mund të gjenden në restorante të nivelit të lartë nga Europa në Japoni dhe që kanë fituar çmime të shumta ndërkombëtare.

Aktualisht vendi po përballet me më pak incidente klimatike ekstreme sesa në Francë, ku ngrohja e dimrit mund të shkaktojë që hardhitë e rrushit të prodhojnë sytha të hershëm të prekshëm nga ngricat dhe stuhitë e dhunshme breshëri mund të shkatërrojnë një vit punë në minuta.

Një sfidë e rëndësishme për industrinë e re të verës në Suedi është dërgimi i produktit tek konsumatorët në mbarë botën. Ndryshe nga Franca dhe vendet e tjera tradicionale të rritjes së verës, mbështetja e qeverisë nuk ekziston. Kantinat janë të rregulluara rreptësisht dhe ato nuk mund t’u shesin drejtpërdrejt konsumatorëve për shkak të monopolit shtetëror të Suedisë në shitjen e alkoolit.

Verëbërësit shpresojnë se kjo do të ndryshojë me zgjerimin e vreshtave. Megjithëse sipërfaqja e mbjellë e hardhive po rritet me shpejtësi, është vetëm rreth 150 hektarë, e vogël në krahasim me gati një milion hektarë në Spanjë dhe më shumë se 800,000 hektarë në Francë.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.