Letrat me vlerë të Qeverisë “joshin” jorezidentët – Prania e tyre te bonot e obligacionet u rrit me 53% në fillim të 2023, 443.3 miliardë në shkurt

Rritja e fortë e normave të letrave me vlerë të Qeverisë që nga mesi i vitit të shkuar, duket se ka ngjallur interes të fortë te investiotërt jorezidentë. Në janar të vitit 2022, totali i letrave me vlerë që u përkisnin jorezidentëve ishte 283.1 miliardë lekë. Në fund të shkurtit të këtij viti, kjo shifër ka arritur në 443.3 miliardë lekë, pra me një rritje prej rreth 53% krahasuar me janarin e 2022. Rritja më e ndjeshme e kurbës vërehet në muajt prill-maj 2022, për të arritur kulmin në muajin tetor me një total prej 446 miliardë lekësh.

Ngritjet e njëpasnjëshme të normës bazë të interesit nga ana e Shqipërisë kanë ndryshuar hartën e subjekteve që financojnë borxhin e brendshëm shtetëror përmes bonove të thesarit e obligacioneve.

Nga të dhënat zyrtare për pjesëmarrjen në ankandet, rezulton se bankat dhe institucionet financiare kanë ulur interesin për bonot e obligacionet për pjesën më të madhe të 2022, hapësirë që është mbushur kryesisht nga individët. Në fund të vitit të shkuar rezulton se 12.1% e letrave me vlerë të Qeverisë janë blerë nga individët, të cilët kanë rritur dukshëm pjesëmarrjen në ankande, nga 10.4% në vitin 2021. Ndërkaq, pjesëmarrja e Bankave tregtare, nga 64,1% në vitin 2021, ka rënë në 62,58% vitin e shkuar.

Shkak i kësaj pjesëmarrje kaq të lartë të individëve gjatë vitit të shkuar u bë rritja e yieldeve të letrave me vlerë të Qeverisë, të cilat arritën rekordin me afrimin e muajve të fundit të 2022. Pjesëmarrje që pritet në rënie këtë vit, megjithëse jo në nivelet aq të ulëta të hasura dy apo tre vitet e mëparëshme.

Pjesëmarrja e bankave dhe raporti i mbulimit të ankandeve të letrave të borxhit prej tyre është rritur dukshëm, si tek bonot, ashtu dhe tek obligacionet gjatë muajve të fundit të 2022.

Lorenc Rabeta/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.