Lufta teknologjike shumë frontale nga Kina – Pekini përqendron forcat tek Inteligjenca Artificiale

Rivaliteti i Kinës jo vetëm me Shtetet e Bashkuara të Amerikës, por edhe me Europën dhe vende të tjera si Japonia, është përshkallëzuar për shkak të luftës së teknologjisë që ka shpërthyer mbi kontrollin e teknologjisë – duke përfshirë mikroçipet dhe inteligjencën artificiale.

Zhvillimi i fundit në këtë betejë të ashpër është se Holanda dëshiron të miratojë legjislacion të veçantë që do të përdoret për të ndaluar studentët kinezë të ndjekin programet universitare dhe kurset mbi teknologjitë e ndjeshme, duke përfshirë mikroçipet dhe mbrojtjen. Ky zhvillim është shumë i rëndësishëm sepse Holanda konsiderohet vendi me teknologjinë më të lartë të prodhimit të mikroçipëve në Europë. ASML Holding me qendër në Holandë është kompania më e madhe gjysmëpërçuese në Kontinentin e Vjetër. ASML me bazë në Veldhoven është një lider botëror në prodhimin e makinerive litografike, të cilat përdorin dritën për të përpunuar silikonin, materialin bazë të mikroçipëve. Klientë të tillë si TSMC i Tajvanit, Samsung i Koresë dhe SMIC i Kinës përdorin pajisjet e kompanisë holandeze për të prodhuar në masë mikroçipe të tillë.

Në tetor 2022, administrata Biden ndaloi kompanitë kineze të blinin mikroçipa të avancuar dhe pajisje për prodhimin e gjysmëpërçuesve pa leje të posaçme. Ajo gjithashtu kufizoi aftësinë e qytetarëve amerikanë për të ofruar mbështetje për zhvillimin ose prodhimin e çipave në objekte të caktuara prodhuese në Kinë. Në Gjermani, ministria e ekonomisë e ndaloi Elmos Semiconductor, një prodhues mikroçipësh makinash, që t’i shiste fabrikën e saj në qytetin e Dortmundit te Silex, e cila është një degë suedeze e Sai Microelectronics të Kinës.

Kina, nga ana e saj, ka ndjekur për vite me radhë një politikë të kufizimit të prodhuesve të huaj të produkteve të teknologjisë në tokën e saj, duke u dhënë atyre një zgjedhje ose të zbulojnë detaje jetike të dizajnit ose të dalin nga tregu. Ligji kinez kërkon që këto produkte, duke përfshirë mikroçipet dhe komponentët lazer, të projektohen, zhvillohen dhe prodhohen në Kinë.

Kina nuk dëshiron të mbetet prapa në zhvillimin e inteligjencës artificiale (AI) dhe gjysmëpërçuesve, dy elementë kryesorë në garën globale për epërsi teknologjike, e cila është një burim kryesor i tensionit gjeopolitik me Shtetet e Bashkuara të Amerikës. I vetëdijshëm se këto dy fusha do të jenë kritike për të ardhmen ekonomike dhe ushtarake të Kinës, Pekini po dyfishon përpjekjet për të gjetur zgjidhje të brendshme pasi Uashingtoni kufizon aksesin në teknologjinë e fundit që Kinës i nevojitet për të prodhuar mikroçipe.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.