Komisioni europian kërkon më shumë para nga vendet e BE – Në total synohen 98.8 miliardë euro kontribute nga shtetet anëtare

Komisioni europian kërkon më shumë para për buxhetin e BE – së, meqënëse shumë gjëra kanë ndryshuar nga 2020, kur u ra dakord për kornizën e fundit financiare shumëvjecare, e vlefshme për 7 vitet e ardhshme.

Komisioneri europian për buxhetin Johannes Hahn shpjegoi se mesazhi për kryeministrat dhe ministrat e financave është i qartë: nëse dëshirojnë të jenë aktorë politikë dhe ekonomikë seriozë në nivel global duhen më shumë burime.

Fillimisht cdo gjë ka të bëjë me luftën në Ukrainë: vendeve anëtare i kërkohen 50 miliardë euro më shumë për 3 vjecarin 2024-2027, për të mbështetur vendim gjatë pushtimit rus dhe për të kontribuar në rindërtimin e tij.

15 miliardë të tjera duhen për t’u përballur me krizën e emigrantëve, ku kërkohet financim dhe nga vendet e Afrikës së Veriut për të kontrolluar flukset dhe atyre të Lindjes së Mesme për të strehuar refugjatët siriamë. 10 miliardë euro do të përdoren për një platformë të re për teknologjitë strategjike, një lloj fondi për sektorët më inovativë të industrisë.

Rreth 19 miliardë euro do të duhen për rimbursimin e interesave mbi borxhin, tre për mjetet e fleksibitetit dhe rreth dy për pagat e zyrtarëve europianë. Paga të cilat kanë rritur për shkak të inflacionit. Në total janë 65.8 miliardë kontribute më shumë që iu kërkohen vendeve anëtare të Bashkimit Europia, dhe 33 më shumë që do të duhet të rimbursohen meqë i janë dhënë borxh Ukrainës.

Nuk bëhet fjalë për një shifër modeste, aq sa disa qeveri nuk duken shumë të gatshme për të bërë lëshime. Sipas të përditshmes ‘Politico”, Gjermania dhe vendet e Ulëta kanë bërë të qartë që tani se nuk kanë ndërmend të japin më shumë para se shifra e vendosur në ndihmë të Ukrainës.

Por pavarësisht kësaj parlamenti europian jep shenja optimizmi. Komisioni europian shpreson të arrijë një marrëveshje me Këshillin dhe Parlamentin brenda gjysmës së muajit nëntor të këtij viti, por negociatat për më shumë fonde parashikohen të vështira, të gjata dhe të komplikuara.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.