Milionat që regbia i “premton” Francës – Kupa e botës shton fitimet, por ende shumë mbrapa futbollit

Komiteti Organizativ i Kupës së Botës në Regbi ‘France 2023’ pret 40 milionë euro fitime, që sipas tyre do t’i kthehen sportit, duke financuar programet, infrastrukturën dhe zhvillimin e këtij sporti. Nuk është çudi që të gjithë janë optimistë. Rreth 2.5 milionë bileta janë shitur në total për kampionatin në fjalë, me çmime që variojnë nga 10 deri në 950 euro.

Turneu i këtij viti në edicionin e dhjetë, pritet të tërheqë gjithsej 600 mijë vizitorë të huaj për një qëndrim mesatar prej dy javësh dhe të sjellë rreth 940 milionë euro në ekonominë e Francës.

Një raport i publikuar më parë nga Ernst & Young’s pohoi se kampionati në Japoni në 2019 – ën regjistroi ndikimin më të lartë ekonomik në historinë e Kupës së Botës në regbi dhe rriti PBB-në me 2.75 miliardë euro.

Duke krahasuar regbinë me sportet e tjera komerciale mund të shihet qartë ndikimin që ka. Kupa e Botës në Regbi konsiderohet të jetë një mega ngjarje sportive në 20 më të ndjekurat, ndërsa Kupa e Botës në Futboll ndër 3 të parat.

Ekspertët e sektorit në Francë janë të bindur se për këtë event, organizatorët mund të gjenerojnë rreth 476 milionë euro të ardhura. Por, në krahasim me FIFA-n, Kupa e Botës 2022 në Katar u solli organizatorëve diku rreth 7.2 miliardë euro.

Janë tre shtytës kryesorë që e vendosin bilancin e Kupës së Botës në Regbi në pozitiv çdo katër vjet, pas tre viteve përgatitore me shpenzime dhe investime të mëdha.

Duke ecur përpara në 10 deri në 20 vitet e ardhshëm, atraktiviteti financiar dhe tregtar i regbisë do të ndryshojë ndjeshëm. Pjesa më e madhe e të ardhurave vjen nga të drejtat e transmetimit, të ndjekura nga sponsorizimet dhe më pas të ardhurat nga biletat dhe mallrat.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.