Nafta rritet në mbi 87 USD – Mbështetet nga konflikti mes Izraelit dhe Hamasit
Nafta po qëndron në rritje në sesionin e sotëm, në një interval nga 2.5% deri në 4%, pasi konflikti mes Izraelit dhe Hamasit ka hyrë në ditën e tretë. Brenti i Londrës po tregtohet në mbi 87 dollarë për fuçi, ndërsa nafta bruto amerikane po tregtohet në rreth 86 dollarë për fuçi.
Mëngjesin e së shtunës, gjatë një feste të madhe hebraike, militantët palestinezë të grupit Hamas nisën një sulm të shumëfishtë ndaj qyteteve Izraelit, nëpërmjet tokës, detit dhe ajrit. Sulmi nisi disa orë pasi mijëra raketa u hodhën nga Gaza drejt Izraelit. Por, pavarësisht rritjes së çmimeve në sesionin e sotëm, analistët deklarojnë se efekti do të jetë i përkohshëm pasi asnjëra palë nuk është një lojtar i rëndësishëm në tregun e naftës.
Frika më e madhe është përhapja e këtij konflikti edhe në vendet e tjera të rajonit, siç është Irani. Nëse shërbimet e inteligjencës do të zbulojnë se sulmi i Hamasit është mbështetur nga Irani, atëherë tregu mund të përballet me rreziqe të mëdha, sepse do të ashpërsohen sanksionet ndaj naftës së Teheranit zyrtar.
Eksportet e naftës nga Irani kanë qenë të kufizuara që kur ish-presidenti amerikan, Donald Trump, në vitin 2018 doli nga marrëveshja bërthamore dhe rivendosi sanksionet që synonin të pakësonin të ardhurat e Teheranit.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.