Miratohet fondi 144 milionë lekë për shpronësimet në aksin e ri rrugor që bashkon Shëngjinin me Velipojën

Qeveria shqiptare ka miratuar një vendim të ri për shpronësime në kuadër të projektit të bashkimit të dy bregdeteve, Shëngjin dhe Velipojë, përmes ndërtimit të një aksi rrugor që kalon në zonën që njihet si ‘Rëra e Hedhur’.

Vendimi parashikon shpronësimin, për interes publik, të pronarëve të pasurive të paluajtshme, pronë private, që preken nga realizimi i projektit “Ndërtimi  i rrugës Shëngjin – Baks – Rrjoll, segmenti nga  km + 0.00  deri  në  km 7 + 310”.

Shpronësimi bëhet në favor të Bashkisë Lezhë.

Referuar vendimit të miratuar në mbledhjen e drejtuar nga zëvëndëskryeministrja dhe ministrja e Infrastrukturës, Belinda Balluku, pronarët e pasurive të paluajtshme, pronë private, që shpronësohen, kompensohen në vlerë të plotë, përmes një fondi prej 144 milionë e 537 mijë lekësh.

Vlera e përgjithshme e shpronësimit do të përballohet nga buxheti i shtetit, llogaria “Fondi i shpronësimeve”, në Bankën e Shqipërisë.

Shpronësimi do të fillojë menjëherë pas botimit të këtij vendimi në “Fletoren zyrtare” dhe afati i përfundimit të shpronësimit është brenda 3 (tre) muajve nga data e hyrjes në fuqi të tij.

Pronarët e pasurive të paluajtshme, pronë private,  do të kompensohen, për efekt shpronësimi, pasi të kenë paraqitur dokumentacionin justifikues për likuidim pranë Agjencisë Shtetërore për Shpronësimin.

Agjencia Shtetërore për Shpronësimin do të kryejë procedurat për likuidimin e pronarëve të shpronësuar.

Ky aks rrugor e shkurton distancën mes Shëngjinit dhe Velipojës në 19 minuta nga 1 orë e 28 minuta që është aktualisht ndërsa krijon një potencial madhor për zhvillimin e turizmit duke bashkuar dy zonat turistike më të rëndësishme të Veri-Perëndimit të vendit.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.