Nafta e mbyll vitin në rritje me 5.7% – Mbështetet nga konflikti mes Rusisë dhe Ukrainës

Çmimet e naftës po qëndrojnë në rritje të lehtë në sesionin e sotëm dhe pritet të publikojnë fitime vjetore për të dytin vit me radhë, ndërkohë që tregu është shoqëruar me zhvillime të mëdha, si konflikti në Ukrainë, forcimi i dollarit dhe kërkesa e dobët, sidomos nga Kina.

Nafta Brent e Londrës pritet ta mbyllë vitin pranë 84 dollarëve për fuçi, ndërsa në sesionin e kaluar ra me 1.2%.

Nafta Bruto amerikane pritet ta mbyllë vitin pranë 79 dollarëve për fuçi. Gjatë vitit 2022 nafta Brent ka realizuar fitime prej rreth 5.7%, pas rritjes me rreth 50% në vitin 2021. Gjatë tremujorit të dytë të vitit, çmimet arritën nivelin rekord prej 139 dollarë për fuçi, si pasojë e pushtimit të Ukrainës nga Rusia.

Nafta Bruto amerikane është rritur gjatë këtij viti me rreth 4.5%, ndërsa në 2021 u rrit me 55%. Gjatë vitit të ardhshëm, investitorët do të jenë të fokusuar te furnizimi i tregut, pas sanksioneve të perëndimit ndaj Rusisë dhe vendosjes së tavanit të çmimeve.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.