Nafta rikuperon pjesërisht humbjet – Mbështetet nga rënia e rezervave në SHBA, javën e kaluar

Çmimet e naftës po qëndrojnë në rritje në sesionin e sotëm, pasi të dhënat e industrisë në SHBA treguan një rënie domethënëse të rezervave, gjatë javës së kaluar. Nafta Brent e Londrës po tregtohet në rreth 81 dollarë për fuçi, ndërsa nafta Bruto amerikane po tregtohet në rreth 77 dollarë për fuçi. Referuar të dhënave të Institutit Amerikan të Naftës, rezervat e naftës bruto ranë më 6.1 milionë fuçi, gjatë javës që u mbyll më 21 prill, ndërsa analistët e anketuar nga Reuters parashikonin një rënie me 1.5 milionë fuçi.

Në sesionin e kaluar, çmimet e naftës ranë me rreth 2%, pasi besimi konsumator ra në nivelin më të ulët në 9 muajt e fundit, gjatë prillit, duke rikthyer shqetësimet për një recesion në ekonominë më të madhe në botë.

Investitorët janë të shqetësuar se, rritja e interesave nga Rezerva Federale, Banka Qendrore Europiane dhe Banka e Anglisë do të ngadalësojë rritjen ekonomike globale, për rrjedhojë edhe kërkesën për naftë. Në këtë mënyrë, është zbehur efekti në rritje i çmimeve, nga vendimi i OPEC+ për të ulur prodhimin edhe me 1.16 milionë fuçi, deri në fund të këtij viti.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.