Nafta rikuperon pjesërisht humbjet – Ndikon dobësimi i dollarit amerikan. OPEC parashikon rritje të kërkesës

Nafta i është rikthyer fitimeve në sesionin e sotëm, duke rikuperuar një pjesë të humbjeve të një dite më parë. Dobësimi i dollarit amerikan ka zbehur shqetësimet për ngadalësimin e kërkesës si pasojë e rritjes së infektimeve me Covid-19 në Kinë, që është konsumatori i dytë më i madh i naftës në botë. Nafta Brent e Londrës po tregtohet në rreth 94 dollarë për fuçi, ndërsa nafta Bruto amerikane po tregtohet në rreth 87 dollarë për fuçi.

Të dy bençmarkët ranë me rreth 1.5% në sesionin e kaluar, ndërsa gjatë tetorit publikuan fitimet e para mujore që nga maji i këtij viti. Duke filluar nga disa e sotme, OPEC+ do të fillojë zbatimin e marrëveshjes për uljen e prodhimit me 2 milionë fuçi në ditë. Gjithsesi, arsyeja kryesore e rritjes së çmimeve është forcimi i dollarit amerikan, pasi i bën lëndët e para më të shtrenjta për zotëruesit e monedhave të tjera.

Një ditë më parë, OPEC rriti parashikimin për kërkesën globale në terma afatmesëm dhe afatgjatë, duke shtuar se nevojiten 12.1 trilionë dollarë investime për të plotësuar kërkesën, pavarësisht tranzicionit të botës drejt burimeve të energjisë së rinovueshme. Masat e reja kundër përhapjes së Covid-19 në Kinë kanë detyruar autoritetet të mbyllin edhe Disney Shanghai, që përkthehet në një kërkesë më të ulët për naftë. Kufizimet strikte kundër pandemisë kanë shkaktuar një rënie të aktivitetit të fabrikave në Kinë, gjatë tetorit, që kanë ndikuar edhe në rënien e importeve nga Japonia dhe Korea e Jugut.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.