Nafta zbret pranë 76 USD për fuçi – Ulja e prodhimit nga Arabia Saudite mund të kompensohet nga Rusia dhe Nigeria

Nafta ka rënë ndjeshëm në sesionin e sotëm, duke kthyer thuajse të gjitha fitimet e realizuara në sesionin e kaluar. Një ditë më parë tregu u mbështet nga deklarata e Arabisë Saudite se do të ulë prodhimin në mënyrë vullnetare edhe me 1 milionë fuçi naftë në ditë, duke filluar nga korriku. Nafta Brent e Londrës po tregtohet në rreth 76 dollarë për fuçi, ndërsa nafta Bruto amerikane po tregtohet pranë 72 dollarë për fuçi.

Në sesionin e së hënës, nafta Brent u rrit me 2.6 dollarë dhe nafta Bruto me 3.3 dollarë, pas vendimit të Arabisë Saudite për të reduktuar kuotat e prodhimin në 9 milionë fuçi naftë në ditë, nga 10 milionë fuçi që prodhoi gjatë majit. Grupimi i OPEC+ prodhon rreth 40% të naftës në botë. Megjithatë, analistët vlerësojnë se vendimi i Arabisë Saudite mund të mos ketë shumë efekt sepse, Rusia, Nigeria dhe Angola mund të rrisin prodhimin, duke zëvëndësuar këtë mungesë që do të krijohet në treg nga Mbretëria.

Ndër zhvillimet e tjera, presidentja e Bankës Qendrore Europiane, Christine Lagarde deklaroi se inflacioni po tregton shenja reale të ngadalësimit, por është ende shumë herë për t’i dhënë fund ciklit të shtrëngimit të politikës monetare.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.