Në Shqipëri mbizotërojnë makinat me naftë – Rritje 100% e autoveturave elektrike vitin e kaluar, por në numër tepër të vogël

Makinat me djegie të brendshme kanë mbizotëruar në rrugët e Shqipërisë edhe gjatë vitit të kaluar. Të dhënat më të fundit të INSTAT tregojnë se rreth 90% e autoveturave që qarkullojnë në vendin tonë janë me naftë dhe benzinë, një shifër në rritje krahasuar me vitin 2021.

Ndonëse gjatë vitit 2022 çmimet e karburanteve pësuan një rritje të ndjeshme, çka e detyroi qeverinë që të ngrinte Bordin e Transparencës pikërisht për të rregulluar çmimet në treg, këto zhvillime nuk i frenuan shqiptarët për të blerë më shumë makina me djegie të brendshme. Sipas të dhënave zyrtare, numri i këtyre autoveturave është rritur me 7,8% për ato me naftë dhe 4,5% për ato me benzinë. Ndërkohë, numri i autobusëve të regjistruar në vitin 2022, që kanë përdorur lëndë djegëse “Naftë” është rritur me 4,2% krahasuar me vitin 2021.

Por, gjithsesi vërehet një shtim I numrit të automjeteve elektrike me një rritje pothuajse dyfish ndaj vitit paraardhës. Në vitin 2022 në rrugët e vendit tonë qarkulluan 1.245 autovetura elektrike, 1.236 benzinë dhe elektrik, si dhe 439 naftë dhe elektrik. Ndërsa, 396 autovetura kanë qenë me naftë. Gjithashtu, vërehet edhe një rritje e lehtë e autobusëve që punojnë me naftë dhe elektrik.

Gjatë vitit të kaluar numri gjithsej i mjeteve rrugore me status “aktiv” dhe “të çregjistruar përkohësisht” rezulton 796.438 mjete, me një rritje prej 7,5%. Përqindjen më të madhe ndaj numrit gjithsej të mjeteve rrugore e zënë “Autoveturat” (80,3%), “Automjetet për transport të përzier ” (6,5%) dhe “Motor” (5,4%). Në vitin 2022, numri i autoveturave për pasagjerë për 1.000 banorë është 232. Në vitin 2021, ky tregues ishte 212 autovetura për 1.000 banorë

Numri i autoveturave për pasagjerë për 1.000 banorë në qarkun Durrës ishte 301, i ndjekur nga qarku Lezhë me 287 autovetura për 1.000 banorë. Qarku me numrin më të vogël të autoveturave për pasagjerë për 1.000 banorë ishte Korça me 165 njësi.

Dorian Koça / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.