Pagat u rritën, kontributet në nivel minimal – Si kanë ndryshuar të ardhurat në skemën e pensioneve gjatë këtij viti?

Reforma e pagave, që përfshiu rritjen e pagës minimale në rang kombëtar si dhe rritjen e pagave në sektorin publik, duket se ka “shëndoshur” skemën e pensioneve në tërësi. Sipas të dhënave të Ministrisë së Financave, të analizuara nga SCAN TV, rezulton se në 6 muajt e parë të vitit janë mbledhur 66.3 miliardë lekë kontributet për sigurimet shoqërore dhe shëndetësore  të administruara nga Drejtoria e Përgjithshme e Tatimeve, vlerë kjo rekord krahasuar me 5 vitet e fundit, duke u nisur që nga 2019, çka tregon përmirësimin e të ardhurave në skemën e e pensioneve e cila ndër vite është deficitare për shkak të informalitetit në punë, numrit të ulët të kontribuuesve dhe numrit të lartë të përfituesve.

Por, nëse do të marrim në analizë të ardhurat mujore të mbledhura gjatë këtij viti, duket se pavarësisht rritjes së pagës minimale në muajin prill dhe ndryshimit të rrogave në administratën publike, të cilat u bënë efektive gjatë muajit maj dhe qershor, diferenca midis muajve nuk është e lartë, edhe pse pritej që të reflektohej. Kështu të dhënat tregojnë, se paradoksalisht në muajin Qershor janë të ardhurat më të ulëta të mbledhura nga kontributet e sigurimeve shoqërore dhe shëndetësore në raport me të gjithë muajt e tjerë të vitit. Konkretisht gjatë Qershorit 2023, janë arkëtuar 9.2 miliardë lekë nga ky zë, ndërsa në Maj u mblodhën 11.3 miliardë lekë dhe në Prill 12.3 miliardë lekë. Gjithsesi, diferenca me muajt shkurt dhe mars, kur nuk ishte aplikuar rritja e pagave, nuk është shumë e lartë. Sipas legjislacionit në fuqi, sigurimet shoqërore dhe shëndetësore llogariten mbi bazën e pagës së punonjësve, dhe sa më lartë të jetë pagesa aq më shumë kontribute paguhen.

Ndoshta në këto shifra ndikim mund të kenë pasur luhatjet në sektorin privat, rimbursimi i sektorit fason nga kontributet e rritura si rrjedhojë e ndryshimit të pagës minimale, apo pagesa me vonesë e tyre.

 

Kontributet shoqërore dhe shëndetësore 6-mujor

2023 66.3 miliardë lekë

2022  58.7 miliardë lekë

2021 33.1 miliardë lekë

2020 46.8 miliardë lekë

2019  47.8 miliardë lekë

Kontributet shoqërore dhe shëndetësore 6-mujori 2023

Qershor  9.2 mld lekë

Maj  11.3 mld lekë

Prill   12.3 mld lekë

Mars  10.7 mld lekë

Shkurt  10.3 mld lekë

Janar     12.6 mld lekë

Elisabeta Dosku/ SCAN TV

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.