OECD ul pritshmërinë për rritjen globale – Gjithsesi, rreziku për stagflacion mbetet i kufizuar

Lufta në Ukrainë e ka bërë shumë më të zymtë perspektivën e rritjes në një kohë që ekonomia globale duhet të shmangë një periudhë stagflacioni të stilit të viteve 1970. Deklarata u bë nga OECD që uli pritshmëritë e saj për rritjen globale duke rritur njëkohësisht vlerësimin për inflacionin.

Ekonomia botërore pritet të rritet me 3% këtë vit, shumë më pak se 4.5% që parashikohej kur Organizata për bashkëpunim dhe zhvillim ekonomik përditësoi për herë të fundit vlerësimet e saj në dhjetor. Madje parashikohet se rritja do të ngadalësohet dhe më shumë vitin e ardhshëm duke zbritur në 2.8%, nga një parashikim i mëparshëm prej 3.2%.

Ndërkohë, nuk pritet të ketë lehtësim nga rritja e çmimeve brenda një kohe të shkurtër, me inflacionin që pritet të arrijë në 8.5% këtë vit në vendet e OECD, përpara se të bjerë në 6% në vitin 2023. Më parë OECD kishte parashikuar që inflacioni të arrinte në 5% përpara se të zbriste gradualisht në 3% në 2023-shin.

Pavarësisht rritjes më të ulët dhe perspektivës më të lartë të inflacionit, OECD pret një rrezik të kufizuar stagflacioni si ai i përjetuar në mesin e viteve 1970, kur tronditja e çmimit të naftës shkaktoi inflacion të lartë dhe rritje të nivelit të papunësisë.

Në veçanti, ekonomitë e zhvilluara, të cilat varen shumë më tepër nga shërbimet, sesa në vitet 1970, janë më pak intensive energjikisht tani, dhe bankat qendrore kanë më shumë mundësi dhe mënyra për të luftuar inflacionin, pavarësisht shqetësimit të qeverive të ndryshme për nivelin e papunësisë.

OECD tha se kishte pasur një rast të mirë për heqjen e stimulit të qëndrueshëm të politikës monetare në vendet me inflacion të lartë si Shtetet e Bashkuara të Amerikës dhe Europa Lindore.

Ndërsa rritja fiskale e lidhur me pandeminë po i afrohet skadencës, ekonomia e SHBA u pa të rritet me 2.5% këtë vit,  për t’u ngadalësuar më pas në 1.2% në 2023 – më pak se parashikimet e mëparshme për rritje prej 3.7% në 2022-shin dhe 2.4% në 2023-shin.

Ekonomia e Kinës, e cila është goditur nga një valë e re mbylljesh për shkak të infektimeve me COVID-19, shihet në rritje deri në 4.4% këtë vit dhe 4.9% në vijim, nga 5.1% që pritej më parë në të dy vitet.

Më e ekspozuar ndaj importeve ruse të energjisë dhe pasojave nga lufta në Ukrainë, ekonomia e eurozonës, u pa në rritje 2.6% këtë vit dhe 1.6% në 2023, nga parashikimet përkatësisht 4.3% dhe 2.5%.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.