Paga e jetesës kombëtare në Mbretërinë e Bashkuar do të rritet në 11,44 paund në orë!

Ministri i Financave i Mbretërisë së Bashkuar, Jeremy Hunt, ka konfirmuar një rritje të konsiderueshme të pagës kombëtare të jetesës, duke e rritur atë në 11,44 paund (13,15 euro) në orë nga prilli i vitit të ardhshëm.

Lajmi pason rekomandimet nga Komisioni i Pagave të Ulëta, duke nënkuptuar një rritje të dukshme prej 1,02 paund nga norma aktuale prej 10,42 paund.

Rritja – të cilën Thesari e quan si rritja më e madhe e parave ndonjëherë – barazohet me një rritje vjetore prej 1800 paund për ata me të ardhurat më të ulëta.

Deri më tani, paga kombëtare e jetesës ka aplikuar vetëm për britanikët e moshës 23 vjeç e lart. Megjithatë, që nga viti i ardhshëm, paga do të zgjerojë shtrirjen e saj tek 21 dhe 22-vjeçarët, duke ndikuar rreth dy milionë individë.

Jo vetëm që paga kombëtare e jetesës është në rritje, por norma e pagës minimale dhe paga më e ulët ligjore për praktikantët janë vendosur gjithashtu për rritje të konsiderueshme.

Ata të moshës 18 deri në 20 vjeç do të shohin që paga e tyre minimale të rritet në të paktën 8,60 paund në orë nga prilli, duke reflektuar një rritje prej 1,11 paund.

Ndërkohë, individët e moshës 16 dhe 17 vjeç, si dhe praktikantët, do të jenë dëshmitarë të rritjes së pagës së tyre minimale në 6,40 paund në orë, duke shënuar një rritje prej 1,12 paund krahasuar me një vit më parë.

Duke festuar lajmin, kancelari i Thesarit Jeremy Hunt tha se masa “synon t’i japë fund pagave të ulëta në vend, duke përmbushur premtimin tonë të manifestit dhe duke vazhduar ndikimin pozitiv që paga kombëtare e jetesës ka pasur që nga prezantimi i saj në 2016”.

Laura Trott, kryesekretarja e Thesarit, nuk komentoi nëse masat e qeverisë, si ulja e taksave, u ndikuan nga pozicioni i konservatorëve në sondazhe, të cilat vazhdimisht i vendosin ata në rreth 20% prapa Partisë Laburiste të opozitës.

Në vend të kësaj, ajo tha se Hunt dhe kryeministri Rishi Sunak kanë marrë vendime sfiduese në interesin kombëtar për të luftuar inflacionin.

Që nga fillimi i saj në vitin 2016, paga kombëtare e jetesës ka luajtur një rol kryesor në riformimin e peizazhit të pagave. Thesari pretendon se duke ngritur pagën e jetesës në dy të tretat e të ardhurave mesatare, ata kanë reduktuar me sukses përqindjen e punëtorëve me paga të ulëta për orë nga 21.3% në 2010 në 8.9% sot.

Një zëdhënës i Thesarit tha: “E mbështetur nga rritjet e pagave kombëtare të jetesës, përqindja e punëtorëve me paga të ulëta për orë është më shumë se përgjysmuar që nga viti 2010.”

“Për më tepër, pragjet e taksave personale janë dyfishuar, duke lejuar individët që punojnë të fitojnë 1000 paund në muaj pa taksa për herë të parë,” shtoi zëdhënësi. “Kjo lëvizje rikonfirmon angazhimin e qeverisë për të siguruar që puna të shpërblehet gjithmonë.”

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.