Përmirësohet ekonomia e eurozonës – Komisioni europian rishikon parashikimet e tij

Parashikimet pranverore të publikuara nga Komisioni Europian janë optimiste. Autoritetet kanë rritur vlerësimet e tyre të rritjes, krahasuar me shkurtin, duke konfirmuar një ekonomi më solide sesa pritej. Në frontin e llogarive publike, komisioni vazhdon të jetë shumë i kujdesshëm për perspektivat e Italisë. Borxhi publik në ekonominë e tretë më të madhe të eurozonës pritet të mbetet i qëndrueshëm në vitin 2024, krahasuar me vitin 2023.

Nënkryetari i ekzekutivit të Bashkimit Europian, ish-kryeministri letonez Valdis Dombrovskis u shpreh se ekonomia europiane po i reziston shumë mirë agresionit të Rusisë kundër Ukrainës. Megjithatë, sipas tij ka ende ka shumë faktorë rreziku për t’u mbajtur nën vëzhgim. Ai shtoi se për të mbajtur nën kontroll inflacionin, është thelbësore të sigurohet që politika fiskale të mbetet e kujdesshme, ndërsa në të njëjtën kohë të ruhet momenti i reformave dhe investimet. Në thelb, komisioni pret rritje në zonën e euros prej 1.1% në 2023 – shin dhe 1.6% në 2024 – ën.

Në frontin italian, parashikimi është për rritje 1.2 dhe 1.1%, një rritje e lehtë krahasuar me vlerësimet e publikuara në dimër – 0.8% dhe 1%. Vlen të përmendet stanjacioni gjerman me +0.2% këtë vit, i shkaktuar kryesisht nga niveli i lartë i inflacionit. Në këtë drejtim, norma e rritjes së çmimeve në përgjithësi është në rënie graduale, por norma e inflacionit pa përfshirë kostot e energjisë dhe ushqimeve mbetet e lartë. Sipas Brukselit, çmimet dukshëm më të ulëta të energjisë po ulin kostot e prodhimit të kompanive. Konsumatorët po shohin gjithashtu rënien e faturave të tyre të energjisë, edhe nëse konsumi privat pritet të mbetet i ndrydhur, pasi rritja e pagave mbetet pas inflacionit.

Në të njëjtën kohë, vetë ekzekutivi i BE-së paralajmëron se dhe pse Banka Qendrore Europiane e bankat e tjera qendrore të Bashkimit Europian pritet t’i afrohen fundit të ciklit të rritjes së normave të interesit, trazirat e fundit në sektorin financiar mund të shtojnë presionin në kosto dhe lehtësinë e aksesit në kredi. BQE ka rritur sërish koston e parasë ditët e fundit, duke e çuar në 3.75%.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.