Pse pavarësisht rimëkëmbjes ekonomike Greqia po regjistron rritje të kostos së jetesës?!

Greqia ka tejkaluar shumicën e ekonomive europiane në vitet e kaluara, por pse qytetarët nuk mund të përballojnë mallrat bazë dhe pse punëdhënësit kanë mungesë të stafit?

Rritja e lartë, reduktimi i borxhit dhe rritja e investimeve: Ekonomia e Greqisë ka performuar fuqishëm në dy vitet e fundit, duke tejkaluar shumicën e vendeve europiane. Greqia nuk është më “delja e zezë” e familjes europiane, por një histori suksesi reformash dhe rimëkëmbjeje.

Ekspertët, brenda dhe jashtë vendit, thonë se do të vijnë ditë edhe më të mira. “Ka arsye të mira që ekonomia greke të tejkalojë Eurozonën në 3-5 vitet e ardhshme,” tha Kryeekonomisti në Eurobank, Tasos Anastasatos. GDP-ja e Greqisë u rrit 8.4% në 2021 dhe 5.2% në tremujorin e 4-të të 2022.

“Midis tyre janë paketa e madhe e granteve dhe kredive nga Fondi i BE-së për Qëndrueshmërinë dhe Rimëkëmbjen, reputacioni i mirë i vendit, veçanërisht në turizëm dhe likuiditeti i bollshëm i sistemit bankar.” Numrat lulëzojnë në Greqi, por siç ndodh shpesh në ekonomi, situata në terren është krejt ndryshe.

Pagat reale, ose pagat nominale pas zbritjes së inflacionit, nuk kanë ndjekur një rrugë të ngjashme. Në shumë raste, ato kanë rënë për shkak të rritjeve të vazhdueshme të çmimeve. Inflacioni në Greqi në vitin 2022 ishte 9.3%.

Kjo situatë reflektohet edhe në tregun e punës. Gjithnjë e më shumë punëdhënës thonë se e kanë të vështirë të rekrutojnë staf pasi punëtorët mendojnë se pagat nuk janë mjaftueshëm të larta. Mijëra vende pune mbeten vakante në sektorë kritikë për ekonominë greke si shërbimet ushqimore, turizmi dhe ndërtimi.

Papunësia në Greqi në vitin 2022 ishte 11%. Në të njëjtën kohë, konsumatorët grekë janë të detyruar të shkurtojnë blerjet e mallrave bazë për t’u përballur me valën e rritjes së vazhdueshme të çmimeve.

“Le të jemi të sinqertë, ne kemi shkurtuar disa nga blerjet tona. Ne blejmë më pak gjëra. Dikur blija katër kilogramë fruta, tani blej dy ose një. Dhe blerjet tona janë të kufizuara vetëm në ushqim, ne nuk blejmë asgjë tjetër,” tha Evangelia, e cila jeton me pensionin e saj.

“Shitjet tona janë ulur ndjeshëm, nuk e di pse, por njerëzit nuk kanë mundësi të blejnë as mallra bazë”, tha Giorgos, një shitës në tregun e fermerëve. Me zgjedhjet në horizont, qytetarët grekë thonë se inflacioni është shqetësimi i tyre kryesor dhe do të ndikojë në vendimin e tyre se për cilën parti do të votojnë.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.