Putin tundon Turqinë, kërkon ta bëjë atë qendrën e re të gazit të Europës!

Presidenti rus Vladimir Putin ripërsëriti propozimin e tij për ta kthyer Turqinë në një qendër gazi për Europën pasi dërgesat në Gjermani përmes gazsjellësit Nord Stream të Detit Baltik u ndaluan.

Putin hodhi idenë për të eksportuar më shumë gaz përmes gazsjellësit Turk Stream që kalon nën Detin e Zi drejt Turqisë ndërsa u takua me presidentin turk Rexhep Tajip Erdogan në një samit rajonal në Kazakistan.

Është propozimi i dytë i pamundur energjetik që Putin ka paraqitur në disa ditë, me liderët europianë që i quanin shkurtimet e Rusisë në gazin natyror një përpjekje politike për t’i ndarë ato rreth mbështetjes së tyre për Ukrainën. Kjo ka krijuar një krizë energjie që shkon në dimër, e cila ka nxitur inflacionin, ka detyruar disa industri të shkurtojnë prodhimin dhe ka rritur faturat e shërbimeve.

Rusia po tundonte Turqinë që të bëhej një qendër energjetike, një synim afatgjatë strategjik i vendit, ndërsa përpiqej të krijonte ndarje të reja midis vendeve europiane dhe strategjia e Putin nuk kishte gjasa të kishte sukses.

Një ditë më parë, Gjermania hodhi poshtë propozimin e Putin për të rritur flukset e gazit në Europë përmes një lidhjeje të tubacionit Nord Stream 2 nën Detin Baltik, një tubacion që nuk ka qenë kurrë funksional. Moska ka ndërprerë tubacionin paralel të gazit Nord Stream 1 për shkak të atyre që pretendonte se ishin probleme teknike.

Udhëheqësi rus shprehu fillimisht propozimin të mërkurën, duke thënë se Rusia mund të rrisë vëllimin e eksporteve të saj të gazit në Turqi përmes tubacionit të Detit të Zi. Të enjten, ai tha se qendra mund të ndihmojë në rregullimin e çmimeve “të tepruara”.

Erdogan nuk e komentoi publikisht propozimin, por zëdhënësi i Putin, Dimitry Peskov tha se Turqia ka reaguar pozitivisht ndaj idesë. Megjithatë, agjencia shtetërore e lajmeve e Turqisë citoi ministrin turk të Energjisë Fatih Donmez të thoshte të mërkurën se ishte “shumë herët për të vlerësuar” propozimin.

Turqia, anëtare e NATO-s, e cila varet nga Rusia për nevojat e saj energjetike dhe turizmin, ka kritikuar veprimet e Moskës në Ukrainë, por nuk i është bashkuar sanksioneve të SHBA-së dhe Europës kundër Rusisë. Ajo ka ruajtur lidhjet e saj të ngushta si me Moskën ashtu edhe me Kievin dhe është pozicionuar si ndërmjetës mes të dyjave. Ankaraja kohët e fundit ndihmoi ndërmjetësimin e marrëveshjeve kryesore që lejuan ukrainasit të rifillonin eksportet e grurit dhe çuan në një shkëmbim të burgosurish midis Ukrainës dhe Rusisë.

Edhe pse Rusia është ende duke transportuar gaz në Europë përmes Ukrainës, sasia ka rënë në mënyrë drastike me dy tubacionet baltike jashtë funksionit. Gazsjellësi Nord Stream 2 nuk doli kurrë në qarkullim sepse Gjermania bllokoi funksionimin e tij pak para se Rusia të fillonte pushtimin e saj në Ukrainë më 24 shkurt.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.