Qendër ndërkombëtare e kapitalit në Turqi – Erdogan: Do të jetë katalizator për investimet e reja dhe kontrollin e inflacionit
Flukset hyrëse të kapitalit ndërkombëtar në Turqi do të përshpejtohen pasi inflacioni në rritje të vihet nën kontroll, deklaroi presidenti i vendit Erdogan. Sipas tij, përmirësimi i aftësisë kreditore do të ndihet në tregjet vendase të kapitalit, veçanërisht në tregun e aksioneve. Ai theksoi se, stabilizimi i inflacionit do të ndihmojë tregun e aksioneve dhe do të lehtësojë aksesin e investitorëve në burimet financiare.
Presidenti turk nënvizoi se me thellimin e tregjeve të kapitalit në ekonomitë e zhvilluara, sektori real financohet më mirë dhe rriten normat e kursimeve. Ai shtoi se dhe duhet mbajtur një qëndrim më i vendosur në këtë drejtim duke parandaluar këdo, qoftë politikan apo ekonomist, për të manipuluar tregjet e kapitalit.
Erdogan argumentoi gjithashtu se me transformimin gjithëpërfshirës në tregjet e kapitalit dhe Bursën e Stambollit nën hapat e ndërmarrë që kur partia në pushtet mori drejtimin në 2002-shin dhe hapjen e Qendrës Financiare të Stambollit, roli qendror i Turqisë në sektorin financiar është forcuar.
Erdogan theksoi se potenciali i lartë i rritjes së ekonomisë turke po tërheq vëmendjen e investitorëve vendas dhe ndërkombëtarë. Sipas tij në një kohë që ka një tkurrje në ekonominë globale dhe flukset e kapitalit të huaj po bien, Turqia vazhdon të tërheqë kapital të huaj nëpërmjet tregut të saj të aksioneve, domethënë të sigurojë financim për zhvillimin e saj ekonomik.
Duke vënë në dukje se Turqia ka ruajtur pozicionin e saj si një qendër ndërkombëtare e kapitalit, Erdogan tha se vendi ka tërhequr më shumë se 255 miliardë dollarë investime gjatë 21 viteve të fundit.
Dorina Kurtaj / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.