Qershor-korrik, u emetuan 62.7 Mld lekë bono e obligacione – Nivele shumë të ulëta interesi për borxhin qeveritar, thuajse sa norma bazë e BSH

Qeverisë po i buzëqesh fati jo vetëm me borxhin e jashtëm, për shkak të mbiçmimit të lekut, por edhe me atë të brendëshmin, për shkak të normave shumë të ulëta të interesave të bonove e obligacioneve. Sipas të dhënave zyrtare të Ministrisë së Financave, në përputhje me kalendarin tremujor të emetimeve, në muajin qershor 2023 Ministria e Financave dhe  Ekonomisë (MFE) zhvilloi dhjetë ankande, duke ofruar 33.5 miliardë lekë në total, prej të cilave 23.0 miliardë lekë bono thesari dhe 10.5 miliardë lekë obligacione.

Për bonot e thesarit, yield-i mesatar i ponderuar bono thesari 6M është 3.18% dhe u përmbyll në nivelin 3.09%.

Sa i përket korrikut, Ministria e Financave dhe Ekonomisë planifikon ta mbyllë muajin me një total emetimesh prej 29.2 miliardë lekë nga të cilat 13.2 miliardë lekë janë Bono Thesari dhe 16 miliardë lekë janë Obligacione. Për t’u nënvizuar është se gjatë korrikut bonot me afat maturimi 12 mujor dhanë një shenjë te lehtë rritjeje.

Ato qëndruan në nivelin 3.09% në dy ankande radhazi, për t’u ngritur lehtë në 3.14% në ankandin e fundit. Një tjetër veçori e ankandit të mesit të korrikut ishte edhe rënia e investitorëve, prania e të cilëve ka qenë prej muajsh shumë e lartë. Ndërkohë që nga ana e tyre, bankat tregtare po e konkurrojnë fort këtë treg, me oferta për depozita 12-mujore me normë interesi 3%, thuajse e barabartë me normën bazë të interesit te Bankës së Shqipërisë.

Lorenc Rabeta/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.