Përfundon ndërtimi i çerdhes Nr. 4 “Pranverë” në Kamëz falë Programit “EU4Schools”!

Çerdhja Nr. 4 “Pranverë” në Paskuqan të Kamzës është një tjetër institucion që i është shtuar tashmë shportës së gjerë të objekteve të përfunduara në kontekstin e Programit “EU4Schools”.

Me 60 fëmijë, 8 edukatore dhe rreth 5,000 banorë të komunitetit si përfitues të drejtpërdrejtë të këtij investimi për të ardhmen, çerdhja është ndërtuar nga e para sipas parimeve bazë “Ndërtojmë më Mirë” dhe “Ndërtojmë së Bashku”, duke përfshirë: riparimin & përforcimin e plotë të godinës bashkë me suvatimet e brendshme dhe të jashtme; termoizolimin e fasadës me sistem kapotë; rrjetin e brendshëm inxhinierik të pajisur me sistem elektrik cilësor; ndriçimin dhe sistemin ngrohje-ftohje qendrore me eficencë të lartë energjitike; CCTV, IT, rampa; furnizimin me ujë të ngrohtë nëpërmjet paneleve fotovoltaike; punime peizazhi, rinovim i oborrit, kënd lojërash etj.

44 objekte arsimore kanë përfunduar deri tani në kuadër të “EU4Schools”/”BE për Shkollat”, ndërsa 14 objekte të tjera janë aktualisht në proces rindërtimi apo riparimi.

Programi “EU4Schools” financohet nga Bashkimi Evropian me 75 milion Euro dhe zbatohet nga UNDP Albania, duke synuar rindërtimin apo riparimin e 64 objekteve arsimore me 25,000 nxënës, fëmijë e mësues përfitues në total në 11 bashkitë më të prekura nga tërmeti i 26 Nëntorit, 2019.

E . S / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.