“Rritja e pagave, nuk frenon emigracionin” – Salinas: Çështja është më komplekse, të rinjtë duan arritje në karrierë

Ndërhyrja e qeverisë për rritjen e pagave në vend, si në administratë ashtu edhe në sektorin privat, nuk e frenon emigracionin.  Përfaqësuesi i Bankës Botërore në Shqipëri, Emanuel Salinas thekson se fenomeni i migracionit kërkon një ndërhyrje më komplekse, që lidhet edhe me mundësinë për karrierë. Sipas tij, sektori privat ka më shumë potenciale që duhen shfrytëzuar.

Në konferencën e përbashkët për media, Përfaqësuesi i BB në Shqipëri dha më shumë detaje mbi strategjinë 5 vjeçare të partneritetit me qeverinë, sipas të cilit në ekonominë shqiptare do të injektohen 900 milionë dollarë, të cilat do të përqendrohen në 3 shtylla kryesore.

Aktualisht, Bordi i Drejtorëve Ekzekutive të Bankës Botërore ka aprovuar 4 projekte me një vlerë  prej rreth 360 milionë dollarësh, të cilat synojnë rindërtimin e urave, rritjen e rezistencës në bujqësi dhe të aftësisë konkurruese, dixhitalizimin e shërbimeve publike si dhe financimin e politikave të zhvillimit.

Elisabeta Dosku/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.