Rusia ndalon furnizimin me gaz për Europën – Që nga ora 3 e mëngjesit Nord Stream 1 është mbyllur deri më 3 shtator
Rusia ndaloi të mërkurën furnizimet me gaz drejt Europës, duke intensifikuar një betejë ekonomike midis Moskës dhe Brukselit dhe rritur perspektivat e recesionit dhe racionimit të energjisë në disa nga vendet më të pasura të rajonit. Ndërprerja për mirëmbajtjen e Nord Stream 1 nisi në orën 3 të mëngjesit të 31 gushtit dhe do të zgjasë deri në të njëjtën orë të 3 shtatorit, sipas gjigantit shtetëror rus të energjisë Gazprom.
Qeveritë europiane kanë frikë se Moska mund të zgjasë ndërprerjen si hakmarrje për sanksionet perëndimore të vendosura ndaj saj pas pushtimit të Ukrainës dhe kanë akuzuar presidentin rus Vladimir Putin për përdorimin e furnizimeve me energji si një “armë lufte”, por Moska e mohon këtë.
Kufizimet e mëtejshme për furnizimet europiane me gaz do të rrisin një krizë energjie që tashmë ka bërë që çmimet e gazit me shumicë të rriten mbi 400% që nga gushti i vitit të kaluar, duke krijuar një krizë të kostos së jetesës për konsumatorët dhe bizneset dhe detyruar qeveritë të shpenzojnë miliarda për të lehtësuar barrën.
Ndryshe nga mirëmbajtja 10-ditore e muajit të kaluar për Nord Stream 1, këto punime u njoftuan më pak se dy javë përpara dhe po kryhen nga Gazprom dhe jo nga Nord Stream AG, duke u fokusuar në turbinën e fundit operative në stacion. Moska, e cila uli furnizimin nëpërmjet Nord Stream 1 në 40% të kapacitetit në qershor dhe në 20% në korrik, fajëson problemet e mirëmbajtjes dhe sanksionet që thotë se pengojnë kthimin dhe instalimin e pajisjeve. Gazprom tha se mbyllja e fundit është e nevojshme për të kryer mirëmbajtjen e kompresorit të vetëm të mbetur të tubacionit.
Megjithatë, Rusia ka ndërprerë plotësisht furnizimin me Bullgarinë, Danimarkën, Finlandën, Holandën dhe Poloninë dhe ka reduktuar rrjedhat përmes tubacioneve të tjera që nga fillimi i asaj që Moska e quan “operacion special ushtarak” në Ukrainë.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.