Shifra/Sa para paguajnë shqiptarët për t’u siguruar nga fatkeqësitë? – Rritet me 28% portofoli i mbrojtjes së pronave nga katastrofat natyrore dhe zjarri

Ndërsa sigurimet vullnetare kanë shënuar në tërësi një rritje të ndjeshme gjatë vitit 2023, bie në sy rritja e fortë e portofoleve të mbrojtjes nga katastrofat e fakeqësive natyrore. Autoriteti i Mbikqyrjes Financiare raporton se në portofolin sigurimi nga Zjarri dhe Forcat e Natyrës, gjatë muajit janar-prill  2023, vihet re një rritje prej 28.43% e vëllimit të primeve të shkruara bruto të këtij portofoli dhe një rritje me 6.11% e numrit të kontratave të sigurimit, krahasuar me muajin  janar-prill  2022.

Më specifikisht, nga afërisht 7 milionë euro të paguara për periudhën janar prill të vitit 2022, ky portofol rezulton në rreth 9 milionë euro për të njëjtën periudhë të këtij viti. Me ritëm edhe më të lartë është rritur portofoli i dëmtimeve të tjera në pronë, i cili nga 1.4 milionë euro në vitin 2022, ka shkuar në 1.9 milionë gjatë katër muajve të parë të këtij viti.

Në portofolat e Pronës, Përgjegjësive, Garancive të cilat gjatë muajit janar-prill  2023 siguruan mbi 1,703 milionë lekë të ardhura në total, vendin e parë e zunë Zjarri dhe Dëmtime të Tjera në Pronë me rreth 66.48%, të pasuara nga sigurimi i Përgjegjësisë së Përgjithshme me 24.85% të totalit.

Primet e sigurimit vullnetar, gjatë muajit janar-prill  2023 arritën rreth 3,1 miliardë lekë, 26.97% më shumë se në muajin  janar-prill  2022. Numri i kontratave të sigurimit vullnetar u rrit me 2.26% krahasuar me muajin  janar-prill  2022.

Primet e sigurimit vullnetar të Jo-Jetës gjatë muajit janar-prill  2023, patën një rritje me 27.76%  kundrejt muajit janar-prill  2022.

Megjithatë tregu mbetet i dominuar nga sigurimet e detyrueshme. Parë nga këndvështrimi i ndarjes së tregut sipas llojit të sigurimit, i detyrueshëm dhe vullnetar, primet e shkruara bruto të sigurimit vullnetar zënë 46.69% dhe primet e shkruara bruto të sigurimit të detyrueshëm zënë 53.31% të totalit të tregut.

Lorenc Rabeta/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.