“Shpërthimi” i investimeve gjermane në SHBA – Kompanitë konfirmuan zbatimin e 185 projekteve në vitin 2023

SHBA po tërheq investime rekord nga kompani gjermane, të cilat shohin mundësi të mëdha në ekonominë e fortë dhe stimuj tërheqës tatimorë, edhe pse kushtet përkeqësohen si në vend ashtu edhe në Kinë, partnerin e saj më të madh tregtar. Vitin e kaluar ata njoftuan 15.7 miliardë dollarë angazhime kapitale për projektet e SHBA-së, nga 8.2 miliardë dollarë në 2022-shin, sipas të dhënave të përpiluara nga ‘FDi Markets’, një degë e Financial Times, shumë më tepër se 5.9 miliardë dollarë që ata kishin investuar në Kinë.

Shuma e drejtuar në SHBA përbënte rreth 15% të angazhimeve totale në vitin 2023 në projekte të reja zhvillimi ose zgjerimi jashtë shtetit, krahasuar me 6% të një viti më parë. ‘Boom-i’ i investimeve mbulon vitin e parë që kur administrata Biden miratoi “Cut Inflation Act” dhe “Chips and Science Act”, të cilët ofrojnë më shumë se 400 miliardë dollarë lehtësira tatimore, kredi dhe subvencione, që synojnë rindërtimin dhe përshpejtimin e prodhimit amerikan dhe tranzicionin e energjisë.

Kompanitë gjermane njoftuan 185 projekte në SHBA në vitin 2023, nga të cilat 73 ishin në sektorin e prodhimit. Më i madhi prej tyre ishte një investim prej 2 miliardë dollarësh në Karolinën e Jugut nga filiali i automjeteve elektrike të Volkswagen, Scout Motors.

Drejtuesit kryesorë në BASF dhe Siemens Energy, dy nga kompanitë më të mëdha gjermane, thanë se një kombinim i politikës industriale pragmatike nga qeveria e SHBA, një perspektivë e fortë afatgjatë e tregut dhe një fokus në rritje në zinxhirët e furnizimit po krijon terren pjellor për investimet në territorin amerikan.

Ndër të tjera pandemia, tensionet gjeopolitike dhe ndërprerjet e zinxhirit të furnizimit në kanalet e Suezit dhe Panamasë theksuan gjithashtu nevojën për të diversifikuar prodhimin. Një studim i 224 filialeve të kompanive gjermane në SHBA, i publikuar në fillim të shkurtit nga Dhoma Gjermano-Amerikane e Tregtisë, zbuloi se 96% planifikojnë të zgjerojnë investimet deri në vitin 2026.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.