Shqipëria “digjet” nga temperatura rekord – Gjatë kësaj jave Berati, Elbasani dhe Gjirokastra “prekin” 43 gradë Celsius

Kjo javë që sapo ka nisur pritet të shënojë temperatura të larta rekord në vendin tonë. Sipas Shërbimit Meteorologjik Ushtarak, ndikimi i anticiklonit afrikan do të sjellë mot të kthjellët në të gjithë territorin dhe temperatura shumë të larta.

Orët e gjata me diell dhe masat ajrore të nxehta do të bëjnë që termometri të regjistrojë vlera deri në 43 gradë celsius, duke nisur nga e mërkura, kryesisht në qytetet Berat, Elbasan dhe Gjirokastër. Ndërkohë, në qytetin e Bajram Currit temperaturat maksimale gjatë javës në vijim nuk do të kalojë vlerën prej 36 gradë celsius.

Rritja rekord e temperaturave vjen si pasojë e mbërritjes së anticiklonit afrikan Caronte, i cili do të ketë ndikimin e tij kryesisht në Itali dhe vendet e Ballkanit.

Ndërkohë, edhe në disa zona të Spanjës, Francës, Greqisë, Kroacisë dhe Turqisë, temperaturat pritet të kalojnë 40 gradë celsius. Në kryeqytetin e Italisë, Romë, parashikohet që ditën e martë temperatura maksimale të arrijë në 43 gradë celsius, por rekordi, përsa i përket Italisë pritet të regjistrohet në ishujt e Sardenjës dhe Sicilisë, si dhe në rajonin e Puljas ku termometri do të shënojë vlera nga 45 deri në 47 gradë Celsius.

Në këtë periudhë me temperatura tejet të larta, mjekët këshillojnë shmangien e daljeve në diell gjatë orëve të pikut, pirjen e të paktën dy litrave ujë në ditë dhe mos konsumimin e kafesë dhe alkoolit, që janë lëngje dehidratuese.

Dorian Koça/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.